രാജ്യത്ത്​ വാക്​സിൻ സ്വീകരിച്ച രണ്ടുപേർ കൂടി മരിച്ചു; ആരോപണവുമായി കുടുംബം

ന്യൂഡൽഹി: രാജ്യത്ത്​ കോവിഡ്​ പ്രതിരോധ വാക്​സിൻ സ്വീകരിച്ച രണ്ടുപേർ മരിച്ചു. ആന്ധ്രപ്രദേശിൽ ആശ പ്രവർത്തകയും തെലങ്കാനയിൽ അംഗൻവാടി ജീവനക്കാരിയുമാണ്​ മരിച്ചത്​. വാക്​സിൻ സ്വീകരിച്ചതിന്​ ശേഷമായിരുന്നു ഇരുവരുടെയും മരണം.

ഞായറാഴ്ച രാവിലെയാണ്​ 42കാരിയായ ആശ വർക്കർ വിജയലക്ഷ്​മി മരിച്ചത്​. തലച്ചോറിലുണ്ടായ രക്തസ്രാവമാണ്​ മരണകാരണം. ജനുവരി 19ന്​ വാക്​സിൻ സ്വീകരിച്ചതിന്​ ശേഷം ഇവർക്ക്​ ആരോഗ്യ പ്രശ്​നങ്ങൾ ശ്രദ്ധയിൽപ്പെട്ടിരുന്നു. തുടർന്ന്​ ജനുവരി 21ന്​ ഗുണ്ടൂർ സർക്കാർ ആശുപത്രിയിൽ പ്രവേശിപ്പിച്ചു. ഞായറാഴ്​ച ഇവരുടെ മരണം സ്​ഥിരീകരിച്ചു. മൃതദേഹം പോസ്റ്റുമോർട്ടത്തിന്​ അയച്ചതായി ഡോക്​ടർമാർ പറഞ്ഞു.

കൊറോണ വൈറസിനെതിരായ വാക്​സിൻ സ്വീകരിച്ചതിനെ തുടർന്നാണ്​ മരണമെന്ന്​ ബന്ധുക്കൾ ആരോപിച്ചു. ജില്ല കലക്​ടർ സാമുവൽ ആനന്ദ്​ കുനാർ ആശുപത്രിയിൽ ബന്ധുക്കളുമായി സംസാരിച്ചു. വിജയലക്ഷ്​മിയുടെ മകന്​ ജോലി നൽകാമെന്നും കുടുംബത്തിന്​ നഷ്​ടപരിഹാരം നൽകാമെന്നും കലക്​ടർ വാഗ്​ദാനം ചെയ്​തു.

തെലങ്കാനയിലെ വാറങ്കലിൽ 45കാരിയായ അംഗൻവാടി ജീവനക്കാരിയാണ്​ മരിച്ചത്​. ജനുവരി 19നാണ്​ ഇവർ വാക്​സിൻ സ്വീകരിച്ചത്​. ​ശനിയാഴ്ച രാത്രി നെഞ്ചുവേദനയെ തുടർന്ന്​ ഇവർ ചില മരുന്നുകൾ കഴിച്ചശേഷം ഉറങ്ങാൻ കിടന്നു. ഞായറാഴ്ച രാവിലെ മരിച്ചനിലയിൽ കണ്ടെത്തുകയായിരുന്നു. ഇവരുടെ മൃതദേഹം മഹാത്​മ ഗാന്ധി മെ​േമാറിയൽ ആശുപത്രിയിലേക്ക്​ മാറ്റി.

പോസ്റ്റുമോർട്ടം നടത്തുകയും വിദഗ്​ധ പരിശോധനക്കായി സാമ്പിളുകൾ ശേഖരിക്കുകയും ചെയ്​തു. കോവിഡ്​ വാക്​സിൻ സ്വീകരിച്ചതിന്​ ശേഷം തെലങ്കാനയിൽ നെഞ്ചുവേദ​നയെ തുടർന്ന്​ മരിക്കുന്ന രണ്ടാമത്തെ വ്യക്തിയാണ്​ ഇവർ.