കോവിഡ്​ നെഗറ്റീവായാൽ ബാബരി കേസ്​ വിധി കേൾക്കാൻ ഹാജരാകുമെന്ന്​ ഉമ ഭാരതി

ഡെറാഡൂൺ: കോവിഡ്​ നെഗറ്റീവായാൽ താൻ ബാബരി കേസിൽ വിധി പറയുന്ന ദിവസം സുപ്രീംകോടതിയിൽ ഹാജരാകുമെന്ന്​ ബി.ജെ.പി നേതാവും മുൻ കേന്ദ്രമന്ത്രിയുമായ​ ഉമാഭാരതി. കോവിഡ്​ പോസിറ്റീവായ താൻ ആശുപത്രിയിൽ ചികിത്സ തേടിയത്​ വേഗത്തിൽ സുഖം പ്രാപിച്ച്​ സെപ്​റ്റംബർ 30ന്​ സുപ്രീംകോടതിയിൽ ഹാജരാകണം എന്നുള്ളതിനാലാണെന്നും അവർ ട്വിറ്ററിലൂടെ അറിയിച്ചു. ഇന്ന്​ രാവിലെയാണ്​ ഋഷികേശിലെ എയിംസിൽ​ ഉമ ഭാരതിയെ പ്രവേശിപ്പിച്ചത്​.

താൻ ​ഋഷികേശിലെ എയിംസിൽ ചികിത്സതേടി. അതിന്​ മൂന്നുകാരണങ്ങളാണുള്ളത്​. ഒന്ന്​ കേന്ദ്രമന്ത്രി ഡോക്​ടർ ഹർഷ്​ വർധ​െൻറ ആശങ്കയാണ്​. രണ്ടാമത്തെ കാരണം കഴിഞ്ഞ ദിവസം പനി നന്നായി കൂടിയെന്നതാണ്​. മൂന്നാമത്തേത്​ ത​െൻറ ആരോഗ്യം മെച്ചപ്പെട്ട്​ ആശുപത്രിയിൽ നിന്ന്​ നല്ല റിപ്പോർട്ട്​ ലഭിച്ചാൽ ബാബരി കേസ്​ വിധി പ്രഖ്യാപനം കേൾക്കാൻ ​ബുധനാഴ്​ച പ്രത്യേക സി.ബി.ഐ കോടതിയിൽ ഹാജരാകാമെന്നതാണ്​- ഉമ ഭാരതി ട്വീറ്റ്​ ചെയ്​തു.

കഴിഞ്ഞ ദിവസം താൻ കോവിഡ്​ പോസിറ്റീവാണെന്ന്​ അറിയിച്ച ഉമാ ഭാരതി, ഋഷികേശിന്​ സമീപത്തുള്ള വന്ദേമാതരം കുഞ്ച്​ എന്ന സ്ഥലത്ത്​ ക്വാറൻറീനിൽ കഴിയുകയാണെന്നും ആവശ്യമെങ്കിൽ വൈദ്യസഹായം തേടുമെന്നും ട്വീറ്റ്​ ചെയ്​തിരുന്നു.

1992 ഡിസംബര്‍ ആറിന് കർസേവകർ ബാബരി മസ്​ജിദ്​ തകർത്ത കേസിൽ സെപ്​റ്റംബർ 30ന്​ സുപ്രീംകോടതി വിധി പറയ​ും. പള്ളി തകര്‍ത്ത പ്രതികളായ എല്‍.കെ. അദ്വാനി, മുരളി മനോഹര്‍ ജോഷി, ഉമ ഭാരതി, കല്യാണ്‍ സിങ്​ അടക്കമുള്ള മുതിര്‍ന്ന ബി.ജെ.പി നേതാക്കളോട് വിധിപറയുന്ന ദിവസം ഹാജരാകണമെന്ന് വിചാരണ കോടതി നിർദേശിച്ചിരുന്നു.