ആശുപത്രികളിൽ​ പ്രവേശനം ലഭിച്ചില്ല; 100ഓളം അശരണർക്ക്​ ആശ്രയമായിരുന്ന ഡോക്​ടർ കോവിഡ്​ ബാധിച്ച്​ മരിച്ചു

ന്യൂഡൽഹി: ആശുപത്രിയിൽ സൗകര്യമില്ലാത്തതിനാൽ വീട്ടിൽ​ നിരീക്ഷണത്തിൽ കഴിഞ്ഞിരുന്ന കോവിഡ്​ രോഗിയായ ഡോക്​ടർ ഓക്​സിജൻ ലഭിക്കാതെ മരിച്ചു. 60കാരനായ ഡോ. പ്രദീപ്​ ബിജാൽവനാണ്​ ശരീരത്തിൽ ഓക്​സിജന്‍റെ അളവ്​ ക്രമാതീതമായി കുറഞ്ഞതിനെ തുടർന്ന്​ മരണത്തിന്​ കീഴടങ്ങിയത്​.

കോവിഡ്​ സ്​ഥിരീകരിച്ചതിനെ തുടർന്ന്​ ആശുപത്രികളിൽ പ്രവേശിക്കാൻ ശ്രമിച്ചെങ്കിലും കിടക്ക ഒഴിവില്ലാത്തതിനാൽ വീട്ടിൽ സ്വയം ചികിത്സക്ക്​ തയാറാകുകയായിരുന്നു.

ഒരു പതിറ്റാണ്ടായി ഡൽഹിയിലെ അശരണരായ ആളുകളുടെ ചികിത്സക്കും ക്ഷേമത്തിനും വേണ്ടി പ്രവർത്തിക്കുകയായിരുന്നു ​അദ്ദേഹം. കോവിഡ്​ മഹാമാരി സമയത്തും ജനങ്ങളെ സഹായിക്കാൻ അദ്ദേഹം മുന്നോട്ടുവന്നു. ഐ.എ.എസ്​ ഉദ്യോഗസ്​ഥനും മനുഷ്യാവകാശ പ്രവർത്തകനുമായ ഹർഷ മന്ദറുമായി ചേർന്നുപ്രവർത്തിക്കുകയായിരുന്നു അദ്ദേഹം.

തെരുവോര ആരോഗ്യ സുരക്ഷയുടെ ഭാഗമായായിരുന്നു പ്രവർത്തനം. ഇതിലൂടെ ഡൽഹിയിലെ ഭവന രഹിതരായ ആളുകളെ എല്ലാദിവസവും രാത്രി ആരോഗ്യ പ്രവർത്തകർക്കൊപ്പം സന്ദർശിക്കുകയും ക്ഷേമം ഉറപ്പാക്കുകയും ചെയ്​തിരുന്നു. 100ഓളം ഭവനരഹിതർക്ക്​ ആ​ശ്രയമായിരുന്നു ഇദ്ദേഹം. ആവശ്യക്കാർക്ക്​ സമയം നോക്കാതെ സഹായം എത്തിച്ചുനൽകുന്ന വ്യക്തിയായിരുന്നു ഡോക്​ററെന്ന്​ ഹർഷ മന്ദർ ഇന്ത്യൻ എക്​സ്​പ്രസിനോട്​ പ്രതികരിച്ചു.

കോവിഡ്​ ബാധിതരെയും ക്ഷയരോഗ​ ബാധിതരെയും ചികിത്സിക്കാൻ ഇദ്ദേഹം സമയം കണ്ടെത്തിയിരുന്നു. അതിനിടെ ഡോക്​ടർക്കും രോഗം സ്​ഥിരീകരിക്കുകയായിരുന്നു. ഒരു ഡോക്​ടറായതിനാൽ തന്നെ ആരോഗ്യ സ്​ഥിതിയെക്കുറിച്ച്​ ബോധവാനായിരുന്ന അദ്ദേഹം ചികിത്സക്ക്​ ആശുപത്രികളെ സമീപിച്ചെങ്കിലും കിടക്ക ഒഴിവില്ലാത്തതിനാൽ പ്രവേശനം ലഭിച്ചില്ല. ഇതോടെ വീട്ടിൽ സ്വയം ചികിത്സിക്കാൻ അദ്ദേഹം തീരുമാനിച്ചു. എന്നാൽ ഓക്​സിജൻ ലഭ്യമല്ലാതായതോടെ അദ്ദേഹം മരണത്തിന്​ കീഴടങ്ങുകയായിരുന്നു.