അലിമുദ്ദീന്‍ അന്‍സാരി കൊല: ജാമ്യം ലഭിച്ചവർക്ക്​ കേന്ദ്രമന്ത്രിയുടെ സ്വീകരണം

റാഞ്ചി: കാറില്‍ ബീഫ് കടത്താന്‍ ശ്രമിച്ചെന്ന് ആരോപിച്ച്  ജാർഖണ്ഡിലെ രാംഗഡില്‍ മാംസ വ്യാപാരി അലിമുദ്ദീന്‍ അന്‍സാരി(55) യെ റോഡിലിട്ട് അടിച്ച് കൊന്ന കേസിൽ ജാമ്യം നേടിയ ഗോരക്ഷകര്‍ക്ക് കേന്ദ്ര മന്ത്രിയുടെ നേതൃത്വത്തിൽ സ്വീകരണം. കേന്ദ്ര വ്യോമയാന സഹമന്ത്രി ജയന്ത് സിന്‍ഹ പ്രതികളെ പുഷ്​പഹാരമണിയിച്ചും മധുരപലഹാരം നൽകിയും അനുമോദിക്കുന്ന ചിത്രങ്ങൾ പുറത്തായതോടെ സംഭവം വിവാദമായി. ബി.ജെ.പി നേതൃത്വമായിരുന്നു​ സ്വീകരണം ഒരുക്കിയത്​. കേസിൽ വിചാരണകോടതി ജീവപര്യന്തം തടവിന്​ ശിക്ഷിച്ച പ്രതികൾക്ക്​ ജാർഖണ്ഡ്​ ഹൈകോടതി ജാമ്യം അനുവദിക്കുകയായിരുന്നു. 

2017 ജൂണിലാണ് കേസിനാസ്​പദമായ സംഭവം നടന്നത്​. അലിമുദ്ദീൻ ത​​​െൻറ കാറിൽ ബീഫ്​ കടത്തിയെന്നാരോപിച്ച്​ ഗോരക്ഷാ പ്രവർത്തകർ അദ്ദേഹത്തെ മർദ്ദിക്കുകയായിരുന്നു. സംഘം ചേർന്നുള്ള മർദനത്തിൽ അലിമുദ്ദീൻ കൊല്ലപ്പെട്ടു.​ പ്രകോപിതരായ ഗോരക്ഷ ഗുണ്ടകൾ അലിമുദ്ദീന്‍റെ കാർ കത്തിക്കുകയും ചെയ്​തു.  

കേസില്‍ 11 പേരെ അതിവേഗ വിചാരണ കോടതി കഴിഞ്ഞ മാര്‍ച്ചില്‍ ജീവപര്യന്തം തടവിന് ശിക്ഷിക്കുകയും  പ്രായപൂര്‍ത്തിയാകാത്ത ഒരു പ്രതിയെ ജുവനൈല്‍ ഹോമില്‍ പ്രവേശിപ്പിക്കുകയും ചെയ്തിരുന്നു. വിധിക്കെതിരെ ജാർഖണ്ഡ്​ ഹൈകോടതിയെ സമീപിച്ച ബി.ജെ.പി പ്രാദേശിക നേതാവ് നിത്യനാഥ് മെഹാതോ ഉൾപ്പെടെയുള്ള എട്ട്​ പ്രതികള്‍ക്ക്​ തെളിവി​​​െൻറ അഭാവം ചൂണ്ടിക്കാട്ടി ജാമ്യം നൽകുകയായിരുന്നു.  

അലിമുദ്ദീനെ പ്രതികള്‍ മര്‍ദിക്കുന്നത് ആരും കണ്ടിട്ടില്ലെന്നും പുറത്ത് വന്ന വീഡിയോയിൽ ഇവര്‍ അക്രമിക്കുന്ന ദൃശ്യങ്ങളില്ലെന്നും ഇയാളെ ജനക്കൂട്ടം തടഞ്ഞുവെച്ചപ്പോള്‍ പ്രതികള്‍ അതി​​​െൻറ ഭാഗമാവുക മാത്രമാണുണ്ടായതെന്നും പ്രതിഭാഗം അഭിഭാഷകന്‍ ബി.എം. ത്രിപാഠിയുടെ വാദം.  

പ്രതികള്‍ക്ക് ജാമ്യം നല്‍കിയ ഹൈകോടതി വിധിക്കെതിരെ സുപ്രീംകോടതിയെ സമീപിക്കാനൊരുങ്ങുകയാണ്​ അലിമുദ്ദീന്‍ അന്‍സാരിയുടെ കുടുംബം. കഴിഞ്ഞ മാർച്ചിൽ അതിവേഗ കോടതി 11 പ്രതികൾക്കും ജീവപര്യന്തം തടവ്​ ശിക്ഷ വിധിച്ചപ്പോൾ കേസിൽ പുനരന്വേഷണം ആവശ്യപ്പെട്ട്​ മന്ത്രി ജയന്ത് സിന്‍ഹ രംഗത്തെത്തിയിരുന്നു.