ഉന്നാവിൽ മരിച്ച രണ്ട്​ ദലിത്​ പെൺകുട്ടികളുടേയും മൃതദേഹങ്ങൾ സംസ്​കരിച്ചു

ലഖ്​നോ​: ഉന്നാവിൽ വയലിൽ വച്ച് വിഷം കഴിച്ച്​ മരിച്ച നിലയിൽ കണ്ടെത്തിയ രണ്ട് ദലിത്​ പെൺകുട്ടികളുടെയും മൃതദേഹങ്ങൾ വെള്ളിയാഴ്ച സംസ്​കരിച്ചു. പൊലീസിന്‍റെയും പ്രാദേശിക അധികാരികളുടെയും വലിയ സംഘത്തെ വിന്യസിച്ചുകൊണ്ട്​ കനത്ത സുരക്ഷയിലായിരുന്നു സംസ്​കാര ചടങ്ങുകൾ നടന്നത്​.

വീട്ടിൽ നിന്ന്​ അകലെയല്ലാത്ത സ്ഥലത്ത്​ പെൺകുട്ടികളുടെ കുടുംബാംഗങ്ങളുടെ സാന്നിധ്യത്തിലായിരു​ന്നു​​ ചടങ്ങ്​​. മൃതദേഹം ചിതയിലേക്കെട​ുത്തപ്പോൾ പെൺക​ുട്ടികളിലൊരാളുടെ പിതാവ്​ ബോധരഹിതനായി വീണു. ഇദ്ദേഹത്തെ പൊലീസ്​ ആശുപത്രിയിൽ പ്രവേശിപ്പിച്ചു.

വ്യാഴ​ാഴ്ചയാണ് പ്രായപൂർത്തിയാവാത്ത​ രണ്ട്​ പെൺകുട്ടികളേയും വയലിൽ മരിച്ച നിലയിൽ കണ്ടെത്തിയത്​. മറ്റൊരു പെൺകുട്ടി ഗ​ുരുതരാവസ്ഥയിൽ കാൺപൂർ ആശുപത്രിയിൽ ചികിത്സയിലാണ്​. പെൺകുട്ടികളുടെ വായിൽ നിന്ന്​ നുരയും പതയും വന്ന നിലയിലായിരുന്നു.

പെൺക​ുട്ടികൾ വീട്ടിൽനിന്ന്​ വയലിലേക്ക്​ പോയ വഴിയെല്ലാം ഡോഗ്​ സ്​ക്വാഡ്​ പരിശോധന നടത്തി. മരണ കാരണം വ്യക്തമല്ല. ആന്തരാവയവങ്ങൾ രാസപരിശോധനക്ക്​ അയക്കും. പെൺകുട്ടികൾ മരിച്ചു കിടന്ന വയൽ പ്രദേശത്തു നിന്ന് തെളിവ്​ കണ്ടെത്താനുള്ള പരിശോധനകൾ നടത്തുമെന്നും പൊലീസ്​ അറിയിച്ചു.