അമ്മയില്ലാത്ത കുഞ്ഞാണിതെന്ന്​ കരഞ്ഞു പറഞ്ഞിട്ടും കരളലിയാതെ പൊലീസ്​; യു.പിയിൽ നിന്നുള്ള ക്രൂര ദൃശ്യങ്ങൾ -വിഡിയോ​

ഒരു കുഞ്ഞിനെ മാറോടടക്കി പിടിച്ചു നിൽക്കുന്നയാളെ പൊലീസ്​ ലാത്തിക്കൊണ്ട്​ പൊതിരെ തല്ലുന്നു, ഭയന്ന്​ കരയുന്ന കുഞ്ഞുമായി അയാൾ ഒാടി രക്ഷപ്പെടാൻ ശ്രമിക്കു​േമ്പാൾ പൊലീസ്​ പിറകെയെത്തി വളഞ്ഞു പിടിക്കുന്നു, കുഞ്ഞിനെ പറിച്ചെടുക്കാൻ നോക്കുന്ന പൊലീസിനോട്​ 'അതിനെ വെറുതെവിടൂ, അമ്മയില്ലാത്ത കുഞ്ഞാണിത്​' എന്ന്​ പറഞ്ഞ്​ നിസഹായനായി അയാൾ കരയുന്നു.. ഒരു സിനിമയിലെ കരളലിയിപ്പിക്കുന്ന സീനുകളൊന്നുമല്ല ഇത്​. കഴിഞ്ഞ ദിവസം ഉത്തർപ്രദേശിലെ കാൺപൂർ ദേഹാത്തിൽ ജില്ലാ ആശുപത്രി വളപ്പിൽ പൊതുജനങ്ങളുടെ കൺമുന്നിൽ അരങ്ങേറിയ സംഭവങ്ങളാണിത്​. ആരോ പകർത്തിയ ഈ ദൃശ്യങ്ങൾ സാമൂഹിക മാധ്യമങ്ങളിൽ വൈറലായി​.

ഭയന്നു കരയുന്ന ഒരു കുഞ്ഞിനെ മാറത്തടക്കി പിടിച്ചു നിൽക്കുന്നയാളെ ഒരു പൊലീസ്​ ഉദ്യേഗസ്​ഥൻ ലാത്തികൊണ്ട്​ നിർദയം തല്ലുന്നതാണ്​ ദൃശ്യങ്ങളിൽ ആദ്യം കാണുന്നത്​. സമീപത്തായി ​പൊലീസ്​ വാഹനവും മറ്റു പൊലീസ്​ ഉദ്യോഗസ്​ഥരുമൊക്കെയുണ്ട്​. ക​ുഞ്ഞിനെ ഉപദ്രവിക്കരുതെന്ന്​ നിലവിളിച്ചുകൊണ്ട്​ അയാൾ ഒാടി രക്ഷപ്പെടാൻ ശ്രമിക്കുന്നതും കാണാം. എന്നാൽ, പിറകെ ഒാടിയെത്തുന്ന പൊലീസ്​ അയാളെ തടഞ്ഞു നിർത്തുന്നു. ഈ സമയമത്രയും നിലവിളിച്ചു കരയുകയാണ്​ അയാളുടെ മാറിൽ അള്ളിപ്പിടിച്ചിരിക്കുന്ന ചെറിയ കുട്ടി.

കുട്ടിയെ അയാളിൽ നിന്ന്​ പറിച്ചെടുക്കാനും പൊലീസ്​ ശ്രമിക്കുന്നുണ്ട്​. നിലവളിച്ചു കരയുന്ന കുട്ടി അയാളിൽ നിന്നുള്ള പിടിവിടുന്നില്ല. 'അമ്മയില്ലാത്ത കുഞ്ഞാണിത്​്​, അതിനെ ഉപദ്രവിക്കരുത്​' എന്ന്​ കരഞ്ഞു പറയുന്നുണ്ട്​ അടിയേറ്റയാൾ. എന്നാൽ, പൊലീസിന്‍റെ ക്രൂരതയിൽ അൽപം പോലും അയവു വരുന്നില്ല.

ഉത്തർപ്രദേശിലെ കാൺപൂർ ദേഹാത്തിലെ അക്​ബർപൂർ ജില്ലാ ആശുപത്രിയിലാണ്​ സംഭവം. ഒ.പി ഡിപ്പാർട്ടുമെന്‍റിലെ സമരവുമായി ബന്ധപ്പെട്ടാണ്​ പൊലീസ്​ അവിടെ എത്തിയതെന്നാണ്​ പ്രാഥമികമായി ലഭിക്കുന്ന വിവരം. മർദനമേറ്റയാൾ ജില്ലാ ആശുപത്രിയിലെ ജീവനക്കാരനാണെന്നും റിപ്പോർട്ടുകളുണ്ട്​. അതേസമയം, മർദനമേറ്റയാളുടെ സഹോദരനാണ്​ ആശുപത്രിയിലെ ജീവനക്കാരനെന്നും ജീവനക്കാരനായ സ​ഹോദരനെ പൊലീസ്​ കസ്റ്റഡിയിലെടുത്തപ്പോൾ തടയാൻ ശ്രമിച്ചയാളിനാണ്​ മർദനമേറ്റതെന്നും മറ്റു ചില റിപ്പോർട്ടുകളുമുണ്ട്​.

പൊലീസ്​ ക്രൂരതയുടെ ദൃശ്യങ്ങൾ സാമൂഹിക മാധ്യമങ്ങളിലൂടെ പ്രചരിച്ചതോടെ സംഭവത്തിൽ പൊലീസിനെതിരെ പ്രതിഷേധമുയർന്നു. ചെറിയ തോതിൽ ബലം പ്രയോഗിക്കുക മാത്രമാണ്​ ചെയ്​തതെന്നായിരുന്നു പൊലീസിന്‍റ ആദ്യ വിശദീകരണം. സ്​ഥിരമായി ശല്യമുണ്ടാക്കുന്നയാളുടെ സഹോദരനാണ്​ മർദനമേറ്റതെന്നും പൊലീസ്​ വിശദീകരിച്ചിരുന്നു. പ്രതിഷേധം ശക്​തമായതോടെ, സംഭവത്തിൽ അന്വേഷണം നടത്തുമെന്നും കുറ്റക്കാരായ പൊലീസുകാർക്കെതിരെ നടപടി എടുക്കുമെന്നും യു.പി പൊലീസ്​ ട്വീറ്റ്​ ചെയ്​തു.