യു.പി മന്ത്രി വിജയ്​ കശ്യപ്​ കോവിഡ്​ ബാധിച്ച്​​ മരിച്ചു; രണ്ടാം തരംഗത്തിൽ മരണമടയുന്ന അഞ്ചാമത്തെ ബി.ജെ.പി എം.എൽ.എ

ലഖ്​നോ: ഉത്തർ പ്രദേശ്​ മന്ത്രി വിജയ്​ കശ്യപ് കോവിഡ്​ ബാധിച്ച്​​ മരിച്ചു. ഗുഡ്​ഗാവിലെ മെഡാന്‍റ ആശുപത്രിയിൽ ചൊവ്വാഴ്ചയായിരുന്നു അന്ത്യം. 56 വയസായിരുന്നു. ഉത്തർപ്രദേശിലെ റെവന്യൂ-പ്രളയ നിയന്ത്രണ വകുപ്പ്​ മന്ത്രിയായിരുന്നു. മുസഫർനഗർ ചർതവാൾ മണ്ഡലത്തിൽ നിന്നുള്ള പ്രതിനിധിയാണ്​.

ഉത്തർപ്രദേശിൽ കോവിഡ്​ ബാധിച്ച്​ മരിക്കുന്ന മൂന്നാമത്തെ മന്ത്രിയാണ്​. കഴിഞ്ഞ വർഷം കമൽ റാണി വരുണും ചേതൻ ചൗഹാനും കോവിഡ്​ ബാധിച്ച്​ മരിച്ചിരുന്നു.

വിജയ്​ കശ്യപിന്‍റെ നിര്യാണത്തിൽ പ്രധാനമന്ത്രി നരേന്ദ്ര മോദി, യു.പി മുഖ്യമന്ത്രി യോഗി ആദിത്യനാഥ്​, ബി.ജെ.പി അധ്യക്ഷൻ സ്വതന്ത്ര ദേവ്​ സിങ്​ എന്നിവർ അനുശോചിച്ചു.

കോവിഡ്​ രണ്ടാം തരംഗത്തിൽ ജീവൻ നഷ്​ടമാവുന്ന അഞ്ചാമത്തെ ബി.ജെ.പി നിയമസഭ സാമാജികനാണ്​ കശ്യപ്​. ദൽ ബഹദുർ കേരി (സലോൺ), കേസർ സിങ്​ ഗൻവാർ (നവാബ്​ഗഞ്ച്​), രമേഷ്​ ദിവാകർ (ഒരയ്യ), സുരേഷ്​ കുമാർ ശ്രീവാസ്​തവ (ലഖ്​നോ) എന്നിവരാണ്​ കോവിഡ്​ ബാധിച്ച്​ മരിച്ച ബി.ജെ.പി എം.എൽ.എമാർ.