ഓടുന്ന സ്​കോർപിയോയുടെ മുകളിൽ പുഷ്​ അപ്​; യുവാവിന്​ യു.പി​ പൊലീസ്​ നൽകിയ 'പ്രതിഫലം' വൈറൽ

ന്യൂഡൽഹി: വൈറലായ 'പുഷ്​ അപി'ന്​ ഉത്തർപ്രദേശ്​ പൊലീസ്​ നൽകിയ ​സമ്മാനമാണ്​ സമൂഹമാധ്യമങ്ങളിൽ ഇപ്പോൾ വൈറൽ. ലക്ഷകണക്കിനുപേർ കണ്ട യുവാവിന്‍റെ പുഷ്​ അപ്​ വിഡിയോക്കായിരുന്നു റിവാർഡ്​.

ഓടുന്ന സ്​കോർപിയോയുടെ മുകളിൽ കയറി പുഷ്​ അപ്​ എടുക്കുന്നതാണ്​ ദൃശ്യങ്ങൾ. ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ വാഹനത്തിന്‍റെ ഉടമസ്​ഥനെയും പുഷ്​അപ്​ എടുത്തയാളെയും ​യു.പി പൊലീസ്​ സ്​റ്റേഷനിലേക്ക്​ വിളിച്ചുവരുത്തുകയായിരുന്നു. കൂടാതെ പിഴ അടപ്പിക്കുകയും ചെയ്​തു.

ഫിറോസാബാദിൽ​െവച്ചാണ്​ വിഡിയോ ഷൂട്ട്​ ചെയ്​തിരിക്കുന്നത്​. സമാജ്​വാദി പാർട്ടി നേതാവ്​ കൃഷ്​ണ മുരാരി യാദവിന്‍റെ മകൻ ഉജ്വൽ യാദവാണ്​​ വിഡിയോയിൽ. കൃഷ്​ണ മുരാരിയുടെ ഉടമസ്​ഥതയിലുള്ളതാണ്​ വാഹനം.

വിഡിയോ അനുകരിച്ച്​ നിരവധിപേർ ഇത്തരത്തിൽ രംഗത്തെത്തുമെന്ന്​ ബോധ്യമായതോടെയാണ്​ പൊലീസിന്‍റെ നടപടി. കൂടാതെ സ്​റ്റേഷനിലെത്തിയ ഇരുവരുടെയും വിഡിയോ പകർത്തി യു.പി പൊലീസിന്‍റെ ഔദ്യോഗിക ട്വിറ്റർ പേജിൽ പങ്കുവെക്കുകയും ചെയ്​തു. അജയ്​ കുമാർ ഐ.പി.എസ്​ സംഭവം വിവരിക്കുന്നതും വിഡിയോയിലുണ്ട്​.

'ചില പുഷ്​ അപുകൾ നിയമത്തിന്‍റെ പരിധിയിൽ വരും' എന്ന അടിക്കുറിപ്പോടെയാണ്​ വിഡിയോ പോസ്റ്റ്​ ചെയ്​തിരിക്കുന്നത്​. 'നിങ്ങൾ കഠിനമായി പരിശ്രമിക്കുകയാണെങ്കിൽ തീർച്ചയായും പ്രതിഫലം നിങ്ങളെ തേടിയെത്തും' എന്ന വാചകവും വിഡിയോയിൽ ഉൾപ്പെടുത്തിയിട്ടുണ്ട്​​. യു.പി പൊലീസിന്‍റെ വിഡിയോ നിരവധിപേരാണ്​ ​ഏറ്റെടുത്തത്​.