യു.പിയിൽ വസ്​തു ഇടപാടുകാരനെ പട്ടാപ്പകൽ വെടിവെച്ച​ുകൊന്നു; ദൃശ്യങ്ങൾ പുറത്ത്​

ആഗ്ര: ബൈക്കിലെത്തിയ രണ്ടുപേർ പട്ടാപ്പകൽ ആഗ്രയിലെ തിര​ക്കേറിയ റോഡിൽ വസ്​തു ഇടപാടുകാരനെ വെടിവെച്ചുകൊല്ലുന്ന ദൃശ്യങ്ങൾ പുറത്ത്​. ഹരീഷ്​ പച്ചൗരിയെന്ന 50കാരനാണ്​ കൊല്ലപ്പെട്ടത്​.

ശനിയാഴ്ച ഉച്ചക്ക്​ ഒരുമണിയോടെ നടന്ന സംഭവം സമീപത്തെ സി.സി.ടി.വി കാമറയിൽ പതിയുകയായിരുന്നു. തിരക്കേറിയ റോഡ്​ മുറിച്ചു കടക്കാനായി നിൽക്കുന്ന ഹരീഷിന്‍റെയടുത്ത്​ ബൈക്ക്​ നിർത്തുന്നതും പിന്നിലിരുന്നയാൾ വെടിവെക്കുന്നതും ദൃശ്യങ്ങളിൽ കാണാം. വെടിയേറ്റ്​ വീഴൂം മുമ്പ്​ ഹരീഷ്​ പിന്നിലിരുന്നയാളെ തള്ളിയിടുന്നുണ്ട്​. പക്ഷേ, അയാൾ എഴുന്നേറ്റ്​ വീണ്ടും രണ്ട്​ തവണ വെടിവെക്കുന്നതും ശേഷം ബൈക്കിൽ കയറി രക്ഷപ്പെടുന്നതും സി.സി.ടി.വിയിൽ പതിഞ്ഞിട്ടുണ്ട്​.

പോയന്‍റ്​ ബ്ലാങ്ക്​ റേഞ്ചിൽ നിന്ന്​ വെടിയേറ്റ ഹരീഷിനെ പിന്നീട്​ ആശുപത്രിയിൽ എത്തിച്ചെങ്കിലും മരിച്ചു. അക്രമികളെ ഇതുവരെ പിടികൂടാൻ ആഗ്ര പൊലീസിന്​ കഴിഞ്ഞിട്ടില്ല. ഹരീഷിന്​ ശത്രുക്കൾ ആരെങ്കിലുമുണ്ടോയെന്ന അന്വേഷണം നടക്കുകയാണെന്ന്​ പൊലീസ്​ പറഞ്ഞു. 'വസ്​തു ഇടപാട്​ സംബന്ധിച്ച തർക്കമാണ്​ കൊലപാതകത്തിൽ കലാശിച്ചതെന്ന്​ സംശയിക്കുന്നു. കൊല്ലപ്പെട്ടയാൾക്ക്​ ശത്രുക്കൾ ഉണ്ടായിരുന്നോയെന്ന്​ വീട്ടുകാരോട്​ അന്വേഷിച്ചുവരികയാണ്​' -ആഗ്ര പൊലീസ്​ സൂപ്രണ്ട്​ ബബ്​ലു കുമാർ പറഞ്ഞു.

A property dealer's murder on a busy Agra intersection , caught on cctv . Amazing impunity . 24 hours after the incident ,still awaiting word from @agrapolice on arrests ... pic.twitter.com/k9ah4ChKMv

— Alok Pandey (@alok_pandey) December 20, 2020