യു.പി + യോഗി = ഉപയോഗി: തെരഞ്ഞെടുപ്പിന് അവസാന അടവും പുറത്തെടുത്ത്​ മോദി

ന്യൂഡൽഹി: നിർണായകമായ സംസ്ഥാന തെരഞ്ഞെടുപ്പിന് മാസങ്ങൾ മാത്രം ബാക്കിനിൽക്കെ ഉത്തർപ്രദേശിൽ അവസാന അടവുകളും പുറത്തെടുത്ത്​ പ്രധാനമന്ത്രി നരേന്ദ്ര മോദി. പുതിയ സമവാക്യങ്ങളുമായാണ്​ ഇക്കുറി മോദി കളത്തിൽ ഇറങ്ങിയിരിക്കുന്നത്​. 36,230 കോടി രൂപയുടെ ഗംഗാ എക്‌സ്‌പ്രസ് വേ പദ്ധതിയുടെ തറക്കല്ലിടൽ ചടങ്ങാണ്​ പൂർണമായും ​'വോട്ടുപിടുത്ത'മാക്കി മാറ്റിയത്​.

യുപി + യോഗി =ബഹുത് ഹേ ഉപയോഗി എന്നാണ്​ ഇന്ന്​ ഉത്തർപ്രദേശിൽ മുഴങ്ങി കേൾക്കുന്നതെന്ന്​ മോദി പറഞ്ഞു. യു.പി മുഖ്യമന്ത്രി യോഗി ആദിത്യനാഥിനെ പുകഴ്​ത്തിയായിരുന്നു സംസാരം. ഇന്ന്​ ബുൾഡോസറുകൾ മാഫിയകളെയും അനധികൃത നിർമ്മാണം തകർക്കുന്നു. അവരെ വളർത്തിയവർക്കാണ്​ ഇപ്പോൾ വേദന. ജനങ്ങൾ യുപി + യോഗി =ബഹുത് ഹേ ഉപയോഗി എന്നാണ്​ പറയുന്നത്​ -മോദി പറഞ്ഞു.

യാദവരുടെ ശക്തികേന്ദ്രമായ മെയിൻപുരി ഉൾപ്പെടെ സംസ്ഥാനത്തിന്‍റെ വിവിധ ഭാഗങ്ങളിൽ മുൻ മുഖ്യമന്ത്രി അഖിലേഷ് യാദവിന്‍റെ സഹായികൾക്കെതിരെ റെയ്​ഡ്​ നടത്തിയ ദിവസമാണ് മോദി പ്രതിപക്ഷ പാർട്ടി​കളെ കടന്നാക്രമിച്ച്​ രംഗത്തെത്തിയത്​. അതേസമയം, കേന്ദ്ര അന്വേഷണ ഏജൻസികളെ ബി.ജെ.പി ദുരുപയോഗം ചെയ്യുകയാണെന്ന് അഖിലേഷ്​ യാദവ് ആരോപിച്ചു. "നേരത്തെ ജനങ്ങളുടെ പണം എങ്ങനെ ഉപയോഗിച്ചു, ഏത് രീതിയിലാണ് നിങ്ങൾ അത് കണ്ടത്.. എന്നാൽ ഇന്ന് യു.പിയിലെ പണം വികസന പ്രവർത്തനങ്ങൾക്കായി ഉപയോഗിക്കുന്നു. നേരത്തെ ഈ പദ്ധതികൾ കടലാസിൽ തുടങ്ങിയത് അവർക്ക് അവരുടെ പണം നിറയ്ക്കാൻ വേണ്ടിയാണ്. ഇന്ന് ഈ പദ്ധതികൾ നിങ്ങളുടെ പണം ലാഭിക്കുകയും നിങ്ങളുടെ പോക്കറ്റിൽ ഉണ്ടെന്നും ഉറപ്പാക്കുന്നു," പ്രധാനമന്ത്രി മോദി പറഞ്ഞു.