യു.എസ് എംബസി ഉദ്യോഗസ്ഥന് കോവിഡ് സ്ഥിരീകരിച്ചു

ന്യൂഡൽഹി: ന്യൂഡൽഹിയിലെ യു.എസ് എംബസിയിലെ ഉദ്യോഗസ്ഥന് കോവിഡ് 19 സ്ഥിരീകരിച്ചു. ഈ ഉദ്യോഗസ്ഥന് മികച്ച ചികിൽസ ഉറപ്പാക്കുന്നതിന് ഇന്ത്യയിലെ ആരോഗ്യമേഖലയിലെ അധികൃതരുമായി ബന്ധപ്പെട്ടിട്ടുണ്ടെന്ന് എംബസി വക്താവ് അറിയിച്ചു.

എന്നാൽ, രോഗം സ്ഥിരീകരിച്ച ഉദ്യോഗസ്ഥൻ അമേരിക്കക്കാരനാണോ ഇന്ത്യക്കാരനാണോ എന്ന് വ്യക്തമാക്കിയിട്ടില്ല. ഈ ഉദ്യോഗസ്ഥന്റെ സമ്പർക്ക വിവരങ്ങൾ ശേഖരിച്ച് വരികയാണ്.

അമേരിക്കയുടെ നയതന്ത്രകാര്യാലയങ്ങളിലെ അമേരിക്കക്കാരായ ഉദ്യോഗസ്ഥരുടെയും അതത് രാജ്യക്കാരായ ജീവനക്കാരുടെയും ആരോഗ്യ സുരക്ഷക്ക് ഏറെ പ്രാധാന്യം കൽപ്പിക്കുന്നുണ്ടെന്നും എംബസി വക്താവ് വ്യക്തമാക്കി.