തെരുവോര കടകളിൽ മാംസവിഭവങ്ങളുടെ പരസ്യ വിൽപന അനുവദിക്കില്ലെന്ന്​ വഡോദര മുൻസിപ്പാലിറ്റി

അഹമ്മദാബാദ്​: തെരുവോര കടകളിൽ മാംസവിഭവങ്ങൾ പരസ്യമായി വിൽക്കാൻ അനുവദിക്കില്ലെന്ന്​ വഡോദര മുൻസിപ്പാലിറ്റി. ഉത്തരവ്​ ലംഘിച്ച്​ വിൽക്കുന്നവർക്കെതിരെ നിയമനടപടികളുമായി മുന്നോട്ട്​ പോകാനാണ്​ മുൻസിപ്പാലിറ്റിയുടെ തീരുമാനം. ഗുജറാത്തിലെ രാജ്​കോട്ടിന്​ പിന്നാലെ വഡോദരയും ഹോട്ടലുകളിലെ മാംസവിൽപനക്ക്​ നിയന്ത്രണമേർപ്പെടുത്തുകയാണെന്ന റിപ്പോർട്ടുകളാണ്​ ഇപ്പോൾ പുറത്ത്​ വരുന്നത്​.

വഴിയോരങ്ങളിലെ സ്​റ്റാളുകളിലും ഉന്തുവണ്ടികളിലുമുള്ള മാംസവിഭങ്ങൾ ശരിയായ രീതിയിൽ മൂടിവെക്കണമെന്നാണ്​ നിർദേശം. മുട്ട ഉപയോഗിച്ച്​​ തയാറാക്കുന്ന ഭക്ഷ്യവിഭവങ്ങൾ വിൽക്കുന്ന കടകൾക്കും നിയന്ത്രണം ബാധകമായിരിക്കും.വഡോദര മുൻസിപ്പൽ ​കോർപ്പറേഷൻ സ്​റ്റാൻഡിങ്​ കമ്മിറ്റി ചെയർപേഴ്​സൺ ഹിതേന്ദ്ര പ​ട്ടേൽ ഇതുസംബന്ധിച്ച നിർദേശം നൽകിയെന്ന്​ പ്രാദേശിക മാധ്യമങ്ങൾ റിപ്പോർട്ട്​ ചെയ്യുന്നു. എന്നാൽ, പ​ട്ടേലി​ന്‍റെ നിർദേശം എങ്ങനെ നടപ്പാക്കുമെന്നത്​ സംബന്ധിച്ച്​ ആശയക്കുഴപ്പമുണ്ടെന്നാണ്​ സൂചന.

വഴിയോര കടകളിൽ വിൽക്കുന്ന മാംസവിഭവങ്ങൾ ആരോഗ്യസുരക്ഷ മുൻനിർത്തി ശരിയായി മൂടിവെക്കണമെന്നാണ്​ പ​ട്ടേലി​ന്‍റെ ഉത്തരവിലുള്ളത്​. പ്രധാന റോഡുകളിൽ നിന്ന്​ മാറി വേണം ഇവയുടെ വിൽപന നടത്താൻ. അല്ലെങ്കിൽ അത്​ ഗതാഗത കുരുക്കിന്​ കാരണമായേക്കുമെന്ന കണ്ടെത്തലും മുൻസിപ്പൽ കോർപ്പറേഷൻ സ്​റ്റാൻഡിങ്​ കമ്മിറ്റി ചെയർപേഴ്​സൺ നടത്തുന്നുണ്ട്​. വഴിയിലൂടെ നടന്നു പോകുന്നവർ മാംസഭക്ഷണം കാണുന്നില്ലെന്ന്​ ഉറപ്പാക്കണമെന്നും ഉത്തരവിൽ നിർദേശമുണ്ട്​.