ബംഗ്ലാദേശ്​ സംഭവത്തിൽ പ്രതിഷേധം; ത്രിപുരയിൽ ഹിന്ദുസംഘടനകൾ നടത്തിയ റാലിക്കിടെ വ്യാപക ആക്രമണം

അഗർത്തല: ബംഗ്ലാദേശിൽ ദുർഗാപൂജക്കിടെയുണ്ടായ അക്രമങ്ങളിൽ പ്രതിഷേധിച്ച്​ ത്രിപുരയിൽ നടത്തിയ റാലിക്കിടെ വ്യാപക ആക്രമണം. വി.എച്ച്​.പി,ആർ.എസ്​.എസ്​, ബജ്​രംഗദൾ തുടങ്ങിയ സംഘടനകൾ നടത്തിയ റാലിക്കിടെയാണ്​ അക്രമമുണ്ടായത്​. മുസ്​ലിം വ്യാപാര സ്ഥാപനങ്ങൾക്ക്​ നേരെ വ്യാപക ആക്രമണമുണ്ടായി. നിരവധി പേർക്ക്​ പരിക്കേറ്റതായും റിപ്പോർട്ടുകളുണ്ട്​. അഗർത്തല, ഉദയ്​പൂർ, കൃഷ്​ണനഗർ, ധർമ്മനഗർ എന്നിവിടങ്ങളിലാണ്​ ആക്രമണമുണ്ടായത്​.

ഉദയ്​പൂരിൽ പ്രതിഷേധിക്കാനെത്തിയ വി.എച്ച്​.പി പ്രവർത്തകരും പൊലീസും തമ്മിൽ ഏറ്റുമുട്ടലുണ്ടായി. മൂന്ന്​ ​െപാലീസുകാർക്ക്​ സംഭവത്തിൽ പരിക്കേറ്റു. പ്രതിഷേധക്കാരിലൊരാൾക്കും പരിക്കേറ്റതായി ത്രിപുര ഇൻസ്​പെക്​ടർ ജനറൽ അരിനാദം നാഥ്​ പറഞ്ഞു. വി.എച്ച്​.പി മാർച്ചിനിടെ ആക്രമണമുണ്ടാവുമെന്ന വിവരത്തെ തുടർന്ന്​ മാർച്ച്​ തടയാനെത്തിയപ്പോ​ഴാണ്​ പൊലീസി​ന്​ നേരെ പ്രവർത്തകർ അക്രമം അഴിച്ചുവിട്ടതെന്നും അദ്ദേഹം വ്യക്​തമാക്കി.

അനിഷ്​ട സംഭവങ്ങളെ തുടർന്ന്​ ത്രിപുരയുടെ വിവിധയിടങ്ങളിൽ നിരോധനാജ്ഞ പ്രഖ്യാപിച്ചിട്ടുണ്ട്​. പ്രതിഷേധത്തെ തുടർന്ന്​ ത്രിപുരയിൽ നടത്താനിരുന്ന ബംഗ്ലാദേശ്​ ഫിലം ഫെസ്റ്റിവൽ മാറ്റിയിട്ടുണ്ട്​.