കോവിഡ്​ ബാധിതനായ പിതാവിന്​ വെള്ളം നൽകാനൊരുങ്ങി മകൾ, തടഞ്ഞ്​ മാതാവ്​; ഞെട്ടിക്കുന്ന ദൃശ്യങ്ങൾ

ഹൈദരാബാദ്​: രാജ്യത്ത്​ കോവിഡ്​ പടർന്നുപിടിച്ചതിന്​ ശേഷം ഞെട്ടിക്കുന്ന ദൃശ്യങ്ങളാണ്​ വിവിധ ഭാഗങ്ങളിൽനിന്ന്​ പുറത്തുവരുന്നത്​. അത്തരത്ത​ിൽ മനസാക്ഷിയെ മരവിപ്പിക്കുന്ന ഒരു ദൃശ്യമാണ്​ ഇപ്പോൾ സമൂഹമാധ്യമങ്ങളിൽ വൈറൽ. കോവിഡ്​ പോസിറ്റീവായതിന്​ ശേഷം വീടിന്​ സമീപം വീണുകിടക്കുന്ന പിതാവിന്​ വെള്ളം നൽകാൻ ശ്രമിക്കുന്ന മകളും അവരെ തടയുന്ന മാതാവുമാണ്​ ദൃശ്യങ്ങളിൽ.

ആ​ന്ധ്രപ്രദേശിലെ ശ്രീകാകുളത്താണ്​ സംഭവം. 50കാരനായ പിതാവ്​ വിജയവാഡയിലാണ്​ ജോലിചെയ്യുന്നത്​. രോഗം സ്​ഥിരീകരിച്ചതോടെ വീട്ടിലേക്ക്​ മടങ്ങിയെത്തുകയായിരുന്നു. രോഗബാധിതനായതിനാൽ വീട്ടിലേക്ക്​ മാത്രമല്ല സ്വന്തം ഗ്രാമത്തിലേക്കും പ്രവേശനം അനുവദിച്ചില്ല. തുടർന്ന്​ ഗ്രാമത്തിന്​ പുറത്ത്​ കുടിലിൽ താമസിച്ച്​ വരികയായിരുന്നു അദ്ദേഹം.

എന്നാൽ, ദിവസങ്ങൾ കഴിഞ്ഞതോടെ ഇയാളുടെ ആരോഗ്യനില വഷളാകുകയായിരുന്നു. രോഗബാധിതനായ പിതാവ്​ നിലത്ത്​ വീണുകിടക്കുന്നത്​ വിഡിയോയിൽ കാണാം. 17കാരിയായ മകൾ വീണുകിടക്കുന്ന പിതാവിന്​ വെള്ളം നൽകാനായി കുപ്പിയുമായി കരഞ്ഞു​െകാണ്ടുപോകുന്നതും മാതാവ്​ തടയുന്നതുമാണ്​ വിഡിയോയിൽ. മാതാവിന്‍റെ എതിർപ്പ്​ വകവെക്കാതെ മകൾ വെള്ളം നൽകുന്നതും അലമുറയിട്ട്​ കരയുന്നതും വിഡിയോയിലുണ്ട്.

ഇയാളെ ചികിത്സിക്കാൻ ആശുപത്രിയിലെത്തിയപ്പോൾ പ്രവേശനം ലഭിച്ചില്ലെന്നും കുടുംബം മുഴുവൻ രോഗബാധിതനായതിനാൽ അയാളുടെ അടുത്തേക്ക്​ പോകാമെന്നും വിഡിയോ ചിത്രീകരിച്ചയാൾ പറയുന്നത്​ കേൾക്കാം. അധികം താമസിയാതെ പിതാവ്​ മരിച്ചതായാണ്​ വിവരം.

ഗ്രാമങ്ങളെയും കുടുംബങ്ങളെയും കോവിഡിന്‍റെ രണ്ടാം വ്യാപനം തകർത്തതിന്‍റെ നേർചിത്രമാണ്​ പ്രചരിക്കുന്ന വിഡിയോ. ആന്ധ്രയിൽ പ്രതിദിനം 20,000ത്തിൽ അധികം പേർക്കാണ്​ കോവിഡ്​ സ്​ഥിരീകരിക്കുന്നത്​. 70ലധികം മരണവും റിപ്പോർട്ട്​ ചെയ്യുന്നുണ്ട്​.