ഇരട്ട എൻജിന്​ വോട്ടുചെയ്യൂ, യു.പിയെ അമേരിക്ക പോലെയാക്കും -​ഗഡ്കരി

പ്രതാപ്​ഗഡ്​: വരാനിരിക്കുന്ന തെരഞ്ഞെടുപ്പിൽ 'ഇരട്ട എൻജിനുകളായ' യോ​ഗി-കേശവ് പ്രസാദ് മൗര്യ നേതൃത്വം നൽകുന്ന ബി.ജെ.പിക്ക്​ വോട്ട് ചെയ്യണമെന്ന്​ കേന്ദ്ര ​ഗതാ​ഗത മന്ത്രി നിതിൻ ​ഗഡ്കരി. യോഗിയെ ജയിപ്പിച്ച്​ ബി.ജെ.പി അധികാരം നിലനിർത്തിയാൽ ഉത്തർപ്രദേശിനെ അമേരിക്കൻ സംസ്ഥാനങ്ങളെ ​​പോലെ വികസിപ്പിക്കുമെന്നും​ അഞ്ച് ലക്ഷം കോടി മുതൽമുടക്കിൽ യു.എസിലേതിന്​ സമാനമായ റോഡുകൾ യു.പിയിൽ നിർമിക്കുമെന്നും മന്ത്രി വാ​ഗ്ദാനം ചെയ്​തു.

ജ​ഗദീഷ്പൂർ, ബാബു​ഗഞ്ച്, ഉൻചഹർ, അല്ലാപൂർ ബൈപാസ് റോഡിന് തറക്കല്ലിടുന്ന ചടങ്ങിൽ സംസാരിക്കുകയായിരുന്നു അദ്ദേഹം. എല്ലാ ഗ്രാമീണ റോ‍ഡുകളും ഹൈവേകളുമായി ബന്ധിപ്പിക്കുക എന്നത് മുൻ പ്രധാനമന്ത്രി അടൽ ബിഹാരി വാജ്പേയിയുടെ സ്വപ്​നമായിരുന്നുവെന്നും അദ്ദേഹം കൂട്ടിച്ചേർത്തു. അടുത്ത വർഷം യു.പിയിൽ നിയമസഭ തെരഞ്ഞെടുപ്പ് നടക്കാനിരിക്കെയാണ് ​ഗഡ്കരിയുടെ വാഗ്ദാനം.