യു.എസ്​ വിസക്ക്​ സോഷ്യൽ മീഡിയ ഹിസ്​റ്ററിയും സമർപ്പിക്കണമെന്ന്​

വാഷിങ്​ടൺ: യു.എസ്​ വിസ അപേക്ഷകരിൽ നിന്ന്​ കൂടുതൽ വിവരങ്ങൾ ശേഖരിക്കാനൊരുങ്ങി ട്രംപ്​ ഭരണകൂടം. വ്യക്​തികളുടെ മുമ്പുണ്ടായിരുന്ന ഫോൺ നമ്പർ, ഇമെയിൽ വിലാസം, സാമൂഹിക മാധ്യമങ്ങളിലെ ഇടപെടലുകൾ എന്നിവയെല്ലാം പരിശോധനക്ക്​ വിധേയമാക്കാനാണ്​ നീക്കം. രാജ്യത്തിന്​ ഭീഷണിയായേക്കുന്നവരുടെ വരവിനെ തടയുകയാണ്​ ഇതിലുടെ യു.എസ്​ ലക്ഷ്യമിടുന്നത്​.

നോൺ ഇമിഗ്രൻറ്​ വിസക്ക്​ അപേക്ഷിക്കുന്നവരിൽ നിന്ന്​ കൂടുതൽ വിവരങ്ങൾ തേടുമെന്നാണ്​ യു.എസ്​ ഭരണകൂടം അറിയിച്ചിരിക്കുന്നത്​. സാമൂഹിക മാധ്യമങ്ങളുടെ വിവരങ്ങളോടൊപ്പം കഴിഞ്ഞ അഞ്ച്​ വർഷമായി ഇവർ ഉപയോഗിച്ചിരുന്ന ഫോൺ നമ്പറുകളുടെ വിവരങ്ങളും നൽകണം. ഇതിനോടൊപ്പം വിസ അ​പേക്ഷകനെ എതെങ്കിലും രാജ്യത്ത്​ നിന്ന്​ പുറത്താക്കിയോ, കുടുംബത്തിലെ ആരെങ്കിലും തീ​വ്രവാദ കേസിൽ പ്രതിയായിരുന്നോ തുടങ്ങിയ കാര്യങ്ങളും യു.എസ്​ ഭരണകൂടം തേടും. 

യു.എസിൽ ഡോണൾഡ്​ ട്രംപ്​ അധികാരത്തിലെത്തിയതോടെയാണ്​ വിസ ചട്ടങ്ങൾ കൂടതൽ കർശനമാക്കിയത്​. അതിവേഗത്തിൽ വിസ നൽകുന്ന സംവിധാനത്തിന്​ പല തവണ ട്രംപ്​ നിയന്ത്രണമേർപ്പെടുത്തിയിരുന്നു. എച്ച്​ 1 ബി വിസ നൽകുന്നതിലും യു.എസ്​ നിയന്ത്രണങ്ങൾ കൊണ്ടു വന്നിരുന്നു.