സർക്കാറിനെ അട്ടിമറിക്കാൻ 'ഒരു കോടിയും മന്ത്രിസ്​ഥാനവും' ബി.ജെ.പി വാഗ്​ദാനം ചെയ്​തെന്ന്​ കോൺഗ്രസ്​ എം.എൽ.എ

റാഞ്ചി: ഝാർഖണ്ഡിലെ സഖ്യസർക്കാറിനെ അട്ടിമറിക്കാൻ ശ്രമിച്ചെന്നാരോപിച്ച്​ മൂന്നുപേർ അറസ്റ്റിലായതിന്​ പിന്നാലെ, പണം വാഗ്​ദാനം ​ചെയ്​തുവെന്ന വെളിപ്പെടുത്തലുമായി കോൺഗ്രസ്​ എം.എൽ.എ. മൂന്നുപേർ നിരവധി തവണ തന്നെ സമീപിച്ചെന്നും സർക്കാറിനെ അട്ടിമറിക്കാൻ സഹായിച്ചാൽ ഒരു കോടി രൂപയും മന്ത്രിസ്​ഥാനം നൽകാമെന്ന വാഗ്​ദാനവും നൽകിയതായും കോലേബിറ എം.എൽ.എ നമൻ ബിക്​സൽ കോങ്കാരി പറഞ്ഞു. ജെ.എം.എം, കോൺഗ്രസ്​ -ആർ.ജെ.ഡി സഖ്യമാണ്​ ഇപ്പോൾ ഝാർഖണ്ഡ്​ ഭരണത്തിൽ.

ആറോളം തവണ മൂന്നുപേർ തന്നെ സമീപിച്ചു. ചില കമ്പനികളിൽ ജോലി ചെയ്യുന്നുവെന്ന്​ വ്യക്തമാക്കി തന്‍റെ പാർട്ടി പ്രവർത്തകർ വഴിയാണ്​ മൂന്നുപേർ കാണാനെത്തിയത്​. നിരവധി തവണ പോകാൻ ആവശ്യപ്പെട്ടിട്ടും വീണ്ടും ഇതേ ആവശ്യവുമായി അവർ എത്തിയിരുന്നു. ഒരിക്കൽ, അവർ ഒരു കോടി രൂപ പണമായി നൽകാമെന്ന്​ അറിയിച്ചു. ഉടൻ തന്നെ താൻ സി.എൽ.പി (കോൺഗ്രസ്​ ലെജിസ്ലേച്ചർ പാർട്ടി) നേതാവ്​ അലംഗിർ അലമിനെയും കോൺഗ്രസ്​ ഝാർഖണ്ഡ്​ നേതാവ്​ ആർ.പി.എൻ. സിങ്ങിനെയും വിവരം അറിയിച്ചിരുന്നു. കൂടാതെ സംഭവത്തെക്കുറിച്ച്​ മുഖ്യമന്ത്രി ഹേമന്ത്​ സോറനും സൂചന നൽകിയിരുന്നു -എം.എൽ.എ പറഞ്ഞു.

പണത്തിന്​ പുറമെ മന്ത്രിസ്​ഥാനവും അവർ എനിക്ക്​ വാഗ്​ദാനം ചെയ്​തിരുന്നു. ന്യൂനപക്ഷ, ഗോത്ര വിഭാഗങ്ങളിലെ എല്ലാ പ്രശ്​നങ്ങളും പരിഹരിക്കാമെന്ന വാഗ്​ദാനവും അവർ നൽകി. ഇത്​ ബി.ജെ.പിക്ക്​ വേണ്ടിയാണെന്നും അവർ ഒരിക്കൽ പറഞ്ഞു. എന്നാൽ ബി.ജെ.പി പ്രവർത്തകരാരും ഇതുവരെ തന്നെ സമീപിച്ചിട്ടില്ല -കോങ്കാരി പറഞ്ഞു.

തന്നെ സമീപിച്ച മൂന്നുപേരെയാണോ ശനിയാഴ്ച അറസ്റ്റ്​ ചെയ്​തതെന്ന കാര്യം വ്യക്തമല്ല. അവരുടെ മുഖം ഓർത്തെടുക്കാൻ സാധിക്കുന്നി​​ല്ലെന്നും എം.എൽ.എ കൂട്ടിച്ചേർത്തു.

ശനിയാഴ്ച അഭിഷേക്​ ദുബെ, അമിത്​ സിങ്​, നിവാരൺ പ്രസാദ്​ മഹതോ എന്നിവരാണ്​ അറസ്റ്റിലാകുന്നത്​. റാഞ്ചി കോട്​വാലി പൊലീസ്​ ഇവർക്കെതിരെ കോൺഗ്രസ്​ ബെർമോ എം.എൽ.എ കുമാർ ജയ്​മങ്കൽ പരാതി നൽകിയിരുന്നു. ക്രിമിനൽ ഗൂഡാലോചന ഉൾപ്പെടെയുള്ള കുറ്റങ്ങൾ ചുമത്തിയാണ്​ കേസ്​.

പ്രതികളിലൊരാളായ നിവാരൺ പ്രസാദിന്‍റെ ഫേസ്​ബുക്ക്​ ബേജിൽ ബി.ജെ.പിയുടെ ധാൻബാദ്​ എം.പി പശുപതി നാഥും പ്രാദേശിക നേതാക്കളുമായി നിൽക്കുന്ന ചിത്രം പോസ്റ്റ്​ ചെയ്​തിട്ടുണ്ട്​. എന്നാൽ അറസ്റ്റിലായവർക്ക്​ പാർട്ടിയുമായി യാതൊരു ബന്ധവുമില്ലെന്നായിരുന്നു ബി.ജെ.പിയുടെ പ്രതികരണം.