'ബി.ജെ.പിയുടെ ചെയ്​തികൾ അത്രയെളുപ്പം ഞങ്ങൾ മറക്കില്ല'; സ​മ​രം തു​ട​ർ​ന്ന്​ ക​ർ​ഷ​ക ​ഗ്രാ​മ​ങ്ങ​ൾ

മൊഹാലി: ''കർഷക വിരുദ്ധ നിയമങ്ങൾ പിൻവലിക്കാൻ ബി.ജെ.പി സർക്കാർ ഒരുവർഷമെടുത്തത്​ ഞങ്ങൾ ഗ്രാമീണർ അ​ത്രയെളുപ്പം മറക്കില്ല. ബി.ജെ.പിക്കെതിരായ രോഷം അത്രയെളുപ്പം തണുക്കുകയുമില്ല. ഭീകരവാദിക​െളന്നും ഖലിസ്​ഥാനിക​െളന്നുമെല്ലാം വിളിച്ചതും 700 ഒാളം കർഷകരുടെ ജീവത്യാഗവുമൊന്നും ഞങ്ങൾക്ക്​ മറക്കാനാകില്ല'' -കർഷക പ്ര​ക്ഷോഭത്തി​െൻറ യുദ്ധമുഖമായ സിംഘു അതിർത്തിക്കടുത്ത ചില്ല ഗ്രാമത്തിലെ ജഗ്​താർ സിങ്​ ഗിൽ പറയുന്നു. മൊഹാലി ജില്ലയിലെ, രണ്ടായിരത്തോളം പേരുള്ള ഇൗ ഗ്രാമത്തിലുള്ളവർ ഒരു പാർട്ടിയുടെയും അനുയായികൾ അല്ലെങ്കിലും സിംഘുവിലെ പ്രക്ഷോഭത്തിൽ സജീവമായി പ​െങ്കടുത്തുവരുന്നവരാണ്​.

ഇൗ പോരാട്ടം അവസാനിക്കുന്നില്ലെന്നും മൂന്നു നിയമങ്ങളും പാർലമെൻറിൽ ഒൗദ്യോഗികമായി പിൻവലിക്കുകയും വിളകൾക്ക്​ മിനിമം താങ്ങുവില (എം.എസ്​.പി) ഉറപ്പാക്കുന്ന നിയമാനുസൃത ഗാരൻറി നൽകുന്നതുവരെ പ്രക്ഷോഭം തുടരുമെന്നും ഗ്രാമവാസി 62 കാരിയായ ഭൂപീന്ദർ കൗർ ഉറപ്പിച്ചുപറയുന്നു. പ്രക്ഷോഭത്തിനിടെ ജീവൻ നഷ്​ടമായവരു​െട കുടുംബങ്ങൾക്ക്​ നഷ്​ടപരിഹാരം നൽകണമെന്നും ഇവർ ആവശ്യപ്പെടുന്നു.

മോദി സർക്കാർ കാർഷിക നിയമങ്ങൾ പ്രഖ്യാപിച്ച്​ രണ്ടു മാസത്തിനുശേഷമാണ്​, ഡൽഹി-ഹരിയാന അതിർത്തിയായ സിംഘുവിലേക്ക്​ കർഷകർ പ്രക്ഷോഭം മാറ്റിയത്​. ഇവിടെനിന്നാണ്​ ഡൽഹി-യു.പി അതിർത്തിയായ ഗാസിപുരിലേക്കും വ്യാപിച്ചത്​.

ചില്ല ഗ്രാമത്തിലെ സ്​ത്രീകൾ ദിവസവും സിംഘുവിലെ ട്രാഫിക്​ ജങ്​ഷനിലെത്തി ഉൗഴമിട്ടാണ്​ സമരമിരിക്കാറ്​്.

ഇതുപോലെ തന്നെയാണ്​ സമീപ ഗ്രാമങ്ങളായ മനൗലി, ഭാഗോ മജ്​റ, സാ​േൻറ മജ്​റ, ഛോട്ടാ റായ്​പുർ, ബഡാ റായ്​പുർ എന്നിവിടങ്ങളിൽനിന്നും ആബാലവൃദ്ധം ജനങ്ങൾ സമരമുഖത്ത്​ എത്താറുള്ളത്​. നിയമങ്ങൾ പിൻവലിച്ചുവെന്ന പ്രധാനമന്ത്രിയുടെ പ്രഖ്യാപനത്തെ സംശയത്തോടെയാണ്​ കാണുന്നതെന്നും പാർലമെൻറിൽ ഇതുസംബന്ധിച്ച ഒൗദ്യോഗിക നടപടികൾ കഴിഞ്ഞാലേ ഇക്കാര്യം ഉറപ്പിക്കാനാകൂ എന്നുമാണ്​ ചില്ലയിൽ സമൂഹ അടുക്കളയിലേക്കുള്ള ആഹാരസാധനങ്ങൾ തയാറാക്കുന്ന മൽകിത്​ കൗറി​െൻറ പ്രതികരണം.

പിൻവലിക്കുമെന്ന പ്രഖ്യാപനം കർഷക സമൂഹത്തി​െൻറ മാത്രമല്ല സാധാരണ ജനങ്ങളുടെ കൂടി വിജയമാണെന്നാണ്​ ജാട്​പുർ ഗ്രാമത്തിലെ കുൽജിന്ദർ സിങ്​ ഗുമാ​ർ പറയുന്നത്​. കുറച്ചുകൂടി നേരത്തേ ഇത്​ പിൻവലിച്ചിരുന്നുവെങ്കിൽ കുറെ മരണങ്ങൾ ഒഴിവാക്കാമായിരുന്നുവെന്ന്​ റസൂൽപുരിലെ ജംഗ്​വീർ സിങ്​ ചൂണ്ടിക്കാട്ടുന്നു. നിയമങ്ങൾ ഒൗദ്യോഗികമായി റദ്ദാക്കപ്പെടുന്നതുവരെ ജാഗ്രതയോടെയിരിക്കണമെന്ന്​ പഞ്ചാബ്​ മുഖ്യമന്ത്രി ചരൺജിത്​ സിങ്​ ചന്നി കഴിഞ്ഞദിവസം കർഷകരോട്​ അഭ്യർഥിച്ചിരുന്നു.