വർഗീയത പ്രചരിപ്പിക്കുന്ന രാഷ്​ട്രീയം വേണ്ട; 500 ബി​.ജെ.പി പ്രവർത്തകർ തൃണമൂലിൽ, പ്രായശ്ചിത്തമായി ചിലർ ​മൊട്ടയടിച്ചു

കൊൽക്കത്ത: ബംഗാൾ ബി.ജെ.പിയിൽ നിന്നും തൃണമൂൽ കോൺഗ്രസിലേക്കുള്ള ഒഴുക്ക്​ തുടരുന്നു. ഹൂഗ്ലി ജില്ലയിലെ 500 ഓളം ബി.ജെ.പി പ്രവർത്തകരാണ്​ ചൊവ്വാഴ്ച തൃണമൂലിൽ തിരിച്ചെത്തിയത്​. അപരുപ പൊഡ്ഡാർ എം.പിയുടെ സാന്നിധ്യത്തിലാണ്​ ബി.ജെ.പി പ്രവർത്തകർ തൃണമൂലിൽ തിരിച്ചെത്തിയത്​.

വർഗീയതയും വിദ്വേഷവും പടർത്തുന്ന കാവി രാഷ്​ട്രീയം മടുത്തെന്ന്​ പ്രവർത്തകർ വാർത്ത സമ്മേളനത്തിൽ പ്രതികരിച്ചു. നിയമസഭ തെരഞ്ഞെടുപ്പിൽ ബി.ജെ.പിയിൽ പ്രവർത്തിച്ച പാപത്തിന്​ പ്രായശ്ചിത്തമായി എട്ടു പ്രവർത്തകർ തലമൊട്ടയടിച്ചിട്ടുണ്ട്​.

തൃണമൂലിൽ നിന്നും ബി.ജെ.പിയിലേക്ക്​ പോയവർക്ക്​ മടങ്ങിവരാമെന്ന്​ മമത പ്രഖ്യാപിച്ചിരുന്നു. ബംഗാളിലെ ബി.ജെ.പിയുടെ പരാജയത്തിന്​ പിന്നാലെ തൃണമൂൽ വിട്ട മുകുൾ റോയ്​ അടക്കമുള്ള മുതിർന്ന നേതാക്കൾ തൃണമൂലിലേക്ക്​ തിരികെയെത്തിയിരുന്നു. അതേ സമയം ഇതെല്ലാം നാടകമാണെന്നാണ്​ ബി.ജെ.പി ആരോപണം.