ഏഴുവർഷം അവർ എന്തുചെയ്​തു? മോദിക്കും ബി.ജെ.പിക്കുമെതിരെ പ്രിയങ്ക ഗാന്ധി

ലഖ്​നോ: പ്രധാനമന്ത്രി നരേന്ദ്രമോദിയെയും ബി.ജെ.പിയെയും രൂക്ഷമായി വിമർശിച്ച്​ കോൺഗ്രസ്​ നേതാവ്​ പ്രിയങ്ക ഗാന്ധി. തെരഞ്ഞെടുപ്പ്​ പ്രചാരണങ്ങൾക്ക്​ മുന്നോടിയായി രാഹുൽ ഗാന്ധി അമേത്തിയിൽ സംഘടിപ്പിച്ച പദയാത്രയിൽ സംസാരിക്കുകയായിരുന്നു പ്രിയങ്ക. കോവിഡിന്‍റെ രണ്ടാം തരംഗത്തിലെ മരണനിരക്കും വിലക്കയറ്റവുമായിരുന്നു ബി.ജെ.പിക്കെതിരായ പ്രധാന വിമർശന ആയുധം.

കോവിഡിന്‍റെ ഒന്നാം തരംഗത്തിൽ ബി.ജെ.പി എന്തുചെയ്​തു? ഓക്​സിജൻ സിലിണ്ടറിന്‍റെ ലഭ്യതക്കുറവിന്​ കാരണം ബി.ജെ.പിയാണെന്നും രണ്ടാം തരംഗത്തിലെ കോവിഡ്​ മരണങ്ങൾക്ക്​ കാരണം ഓക്​സിജന്‍റെ ലഭ്യതക്കുറവാണെന്നും പ്രിയങ്ക പറഞ്ഞു.

ഇന്ത്യയിൽ കോൺഗ്രസ്​ 74 വർഷക്കാലം ഭരിച്ചിട്ടും ഒന്നും ചെയ്​തില്ലെന്ന ബി.ജെ.പിയുടെ വിമർശനങ്ങൾക്കെതിരെയും പ്രിയങ്ക രംഗത്തെത്തി. 'ഏഴുവർഷം അമേത്തിയിൽ (ബി.ജെ.പി) സർക്കാർ എന്ത്​ ചെയ്​തു? ബി.ജെ.പി അനുകൂലമായ ഏകപക്ഷീയ വികസനം മാത്രം ചെയ്​തു' -എന്നായിരുന്നു പ്രിയങ്കയുടെ പ്രതികരണം.

വിലക്കയറ്റം മൂലം രാജ്യത്തെ ജനങ്ങൾ ദുരിതം അനുഭവിക്കുകയാണെന്നും പ്രിയങ്ക കൂട്ടിച്ചേർത്തു. ലഖിംപൂർ കർഷക കൊലപാതകവുമായി ബന്ധപ്പെട്ട്​ കേന്ദ്ര ആഭ്യന്തര സഹമന്ത്രി അജയ്​ മിശ്രയെ ഇതുവരെ നീക്കം ചെയ്യാത്തത്​ എന്തുകൊണ്ടാണെന്നും പ്രിയങ്ക ചോദിച്ചു. കേന്ദ്രത്തിലും സംസ്​ഥാനത്തിലും ബി.ജെ.പി സർക്കാർ രൂപീകരിച്ചതുമുതൽ നുണകളുടെ ഒരു​ വലതന്നെ വിരിച്ചിരിക്കുകയാണെന്നും അവർ പറഞ്ഞു.

ഉത്തർപ്രദേശി​ൽ കോൺഗ്രസ്​ അധികാത്തിലെത്തിയാൽ കർഷകരുടെ എല്ലാ വായ്​പകളും എഴുതിതള്ളുമെന്നും 20 ലക്ഷം പേർക്ക്​ തൊഴിലവസരങ്ങൾ സൃഷ്​ടിക്കുമെന്നും പ്രിയങ്ക കൂട്ടിച്ചേർത്തു.