'ഈ രാജ്യം എന്ന്​ മാറും'; മാസ്​ക്​ ഇല്ലാത്ത വിംബിൾഡൺ ഫൈനൽ ചൂണ്ടിക്കാട്ടി കോടതി ചോദിക്കുന്നു

മുംബൈ: വിംബിൾഡൺ ടെന്നിസ്​ ടൂർണമെന്‍റിന്‍റെ പുരുഷ വിഭാഗം സിംഗിൾസ്​ കലാശപ്പോരാട്ടത്തിൽ ഏവരുടെയും കണ്ണ്​ ലോക ഒന്നാം നമ്പർ താരമായ നൊവാക്​ ദ്യോകോവിചിലായിരുന്നു. ഇതിഹാസങ്ങളായ റോജർ ഫെഡററിന്‍റെയും റാഫേൽ നദാലിന്‍റെയും 20 ഗ്രാൻഡ്​സ്ലാം കിരീടങ്ങളെന്ന അതുല്യ നേട്ടത്തിനൊപ്പമെത്താൻ ദ്യോകോക്കാകുമോ എന്നാണ്​ ഏവരം ഉറ്റുനോക്കിയിരുന്നത്​. എന്നാൽ ബോംബെ ഹൈകോടതിയുടെ നോട്ടം മറ്റൊരിടത്തേക്കായിരുന്നു. വിംബിൾഡൺ ഫൈനൽ കാണാനെത്തിയ കാണികൾ മാസ്​ക്​ ധരിച്ചില്ലെന്ന കാര്യമാണ്​ കോടതി നിരീക്ഷിച്ചത്​.

എന്നാണ്​ ഇന്ത്യ ഇതേപോലെ സാധരണഗതിയിലേക്ക്​ മടങ്ങിപ്പോകുകയെന്നാണ്​ കോടതി ചോദിച്ചത്​. എല്ലാവരെയും വാക്​സിനേഷന്​ വിധേയമാക്കുക എന്നതാണ്​ ഇതിനുള്ള പോംവഴിയെന്നാണ്​ കോടതി പറയുന്നത്​.

മഹാരാഷ്​ട്ര സർക്കാർ കോവിഡ്​ മൂന്നാം തരംഗത്തെ നേരിടാൻ നടത്തുന്ന ഒരുക്കങ്ങളെ കുറിച്ചുള്ള ഒരു പൊതുതാൽപര്യ ഹരജി പരിഗണിക്കുകയായിരുന്നു ജസ്റ്റിസ്​ ദീപാങ്കർ ദത്തയും ജസ്റ്റിസ്​ ജി.എസ്​. കുൽക്കർണിയുമടങ്ങിയ ഡിവിഷൻ ബെഞ്ച്​.

'ഈ വർഷത്തെ മികച്ച ഒരു കാഴ്ചയായിരുന്നു വിംബിൾഡൺ ഫൈനൽ. നിങ്ങൾ അത്​ കണ്ടോ ഇല്ലേ എന്ന്​ അറിയില്ല. ഒരാൾ ​േപാലും മാസ്​ക്​ ധരിച്ചിരുന്നില്ല' -ഹൈകോടതി അ​ഡ്വക്കറ്റ്​ ജനറൽ അശുതോഷ്​ കുംഭകോനി പറഞു. 'സ്​റ്റേഡിയത്തിൽ നിറ​െയ കാണികളായിരുന്നു. ഒരു വനിത ഒഴികെ മറ്റെല്ലാവരും മാസ്​ക്​ ധരിച്ചിരുന്നു. കളി കാണാനെത്തിയ ഒരു ഇന്ത്യൻ ക്രിക്കറ്റ്​ താരവും മാസ്​ക്​ ധരിച്ചിരുന്നില്ല' -ജഡ്​ജി പറഞ്ഞു.

'അത്തരമൊരു സാഹചര്യത്തിലേക്ക്​ ഈ രാജ്യം എന്ന്​ മാറും? എല്ലാവർക്കും കുത്തിവെപ്പ്​ നൽകുകയാണ്​ അതിനായി ചെയ്യേണ്ടത്​'-ഹൈകോടതി പറഞ്ഞു. ഇന്ത്യയിൽ രണ്ട്​ വടക്കു-കിഴക്കൻ സംസ്​ഥാനങ്ങളിൽ കോവിഡ്​ മൂന്നാം തരംഗം തുടങ്ങിയതായി റിപ്പോർട്ടുകളുണ്ട്​. രോഗവ്യാപനത്തിന്​ അൽപം ശമനമുണ്ടെങ്കിലും പ്രതിരോധത്തിൽ വീഴ്​ച വരുത്താൻ പാടില്ലെന്നും ശക്​തമായ മുൻകരുതൽ സ്വീകരിക്കണമെന്നും കോടതി പറഞ്ഞു. മൂന്നാ​ഴ്ചക്ക്​ ശേഷം ഹരജി കോടതി വീണ്ടും പരിഗണിക്കും.