എന്തുകൊണ്ട്​ വാരണാസിയിൽ മൽസരിച്ചു കൂടായെന്ന്​ പ്രിയങ്ക

ന്യൂഡൽഹി: ലോക്​സഭ തെരഞ്ഞെടുപ്പിൽ പ്രിയങ്ക ഗാന്ധി മൽസരിക്കുമെന്ന അഭ്യൂഹങ്ങൾ ശക്​തമാവുകയാണ്​. ഇതിനിടെ എന്തു കൊണ്ട്​ വാരണാസിയിൽ മൽസരിച്ച്​ കൂടായെന്ന ചോദ്യവുമായി രംഗ​ത്തെത്തിയിരിക്കുകയാണ്​ പ്രിയങ്ക​. പാർട്ടി പ്രവർത ്തകർ റായ്​ബറേലിയിൽ മൽസരിക്കണമെന്ന്​ ആവശ്യപ്പെട്ടപ്പോഴായിരുന്നു പ്രിയങ്കയുടെ മറുചോദ്യം.

അതേസമയം, കോൺഗ്രസ്​ മുൻ അധ്യക്ഷയായ സോണിയ ഗാന്ധിയുടെ പ്രചാരണത്തിനായി റായ്​ബറേലിയിൽ സജീവമായി രംഗത്തുണ്ടാവുമെന്നും പ്രിയങ്ക പറഞ്ഞു. തെരഞ്ഞെടുപ്പ്​ പ്രഖ്യാപിച്ചിട്ടും സോണിയ റായ്​ബറേലിയിൽ പ്രചാരണ രംഗത്ത്​ സജീവമായിരുന്നില്ല. പാർട്ടി ആവശ്യപ്പെട്ടാൽ തെരഞ്ഞെടുപ്പിൽ മൽസരിക്കുമെന്ന്​ പ്രിയങ്ക നേരത്തെ വ്യക്​തമാക്കിയിരുന്നു.

ഇക്കുറിയും ബി.ജെ.പി സ്ഥാനാർഥിയായി വാരണാസിയിൽ നിന്നാണ് പ്രധാനമന്ത്രി നരേന്ദ്ര​ മോദി ജനവിധി തേടുന്നത്​. വാരണാസി ഉൾപ്പെടുന്ന കിഴക്കൻ യു.പിയുടെ പ്രചാരണ ചുമതലയാണ്​ പ്രിയങ്കക്ക്​ കോൺഗ്രസ്​ നേതൃത്വം നൽകിയിരിക്കുന്നത്​. പ്രിയങ്കയിലൂടെ യു.പിയിൽ തിരിച്ചു വരവാണ്​ കോൺഗ്രസ്​ ലക്ഷ്യമിടുന്നത്​.