മാഫിയകളെ പത്തടി താഴ്ചയിൽ കുഴിച്ചുമൂടും -ശിവരാജ്​ സിങ്​ ചൗഹാൻ

ഭോപാൽ: സംസ്ഥാനത്ത്​ നിയമവിരുദ്ധ പ്രവർത്തനങ്ങളിലേർപ്പെടുന്നവർക്ക്​ മുന്നറിയിപ്പുമായി മധ്യപ്രദേശ്​ മുഖ്യമന്ത്രി ശിവരാജ്​ സിങ്​ ചൗഹാൻ. നിയമവിരുദ്ധ പ്രവർത്തനങ്ങളിലേർപ്പെടുന്നവരും മാഫിയ സംഘങ്ങളും സംസ്ഥാനം വിട്ടില്ലെങ്കിൽ അവരെ പത്തടി താഴ്ചയിൽ​ കുഴിച്ചു മൂടുമെന്ന്​ ശിവരാജ്​ സിങ്​ ചൗഹാൻ പറഞ്ഞു.

മുൻ പ്രധാനമന്ത്രി അടൽ ബിഹാരി വാജ്​പേയിയുടെ ജൻമവാർഷികത്തോടനുബന്ധിച്ചുള്ള സദ്​​ഭരണ ദിനാചരണ ചടങ്ങിൽ സംസാരിക്കുകയായിരുന്നു അദ്ദേഹം.

''ഞാൻ ഇപ്പോൾ അപകടകരമായ മാനസികാവസ്ഥയിലാണ്. നിയമവിരുദ്ധ പ്രവർത്തനങ്ങളിൽ ഏർപ്പെടുന്നവരെ ഞാൻ വെറുതെ വിടില്ല. മധ്യപ്രദേശിൽ നിന്ന്​ പോകൂ, അല്ലെങ്കിൽ ഞാൻ നിങ്ങളെ പത്തടി താഴ്ചയിലേക്ക്​ കുഴിച്ചു മൂടും, പിന്നെ നിങ്ങളെക്കുറിച്ച്​ ഒരാളും അറിയില്ല.'' -അദ്ദേഹം പറഞ്ഞു.

സദ്​ഭരണം, അതായത് ആളുകൾക്ക് ഒരു കുഴപ്പവും നേരിടാത്ത ഒരു ഭരണകൂടം ഇപ്പോൾ മധ്യപ്രദേശിലുണ്ടെന്നു​ം ചൗഹാൻ കൂട്ടിച്ചേർത്തു.