ന്യൂനപക്ഷ വിഭാഗങ്ങളുടെ ക്ഷേമം ഉറപ്പാക്കുമെന്ന് മന്ത്രി സ്മൃതി ഇറാനി

ന്യൂഡൽഹി: ന്യൂനപക്ഷ മന്ത്രാലയത്തിന്‍റെ അധിക ചുമതല നൽകിയതിന്​ പ്രധാനമന്ത്രി നരേന്ദ്ര മോദിക്ക്​ ഹൃദയം നിറഞ്ഞ നന്ദി അറിയിച്ച് സ്​മൃതി ഇറാനി. ന്യൂനപക്ഷ വിഭാഗങ്ങളുടെ ക്ഷേമത്തിലൂടെ രാജ്യത്തെ സേവിക്കാൻ പൂർണ സമർപ്പണത്തോടെയും ദൃഢനിശ്ചയത്തോടെയും നൽകിയ ഉത്തരവാദിത്തം നിറവേറ്റുമെന്ന്​ സ്മൃതി ഇറാനി പ്രതികരിച്ചു.

മോദി സർക്കാറി​ന്‍റെ ഏക മുസ്​ലിം മുഖമായിരുന്ന മുഖ്​താർ അബ്ബാസ്​ നഖ്​വി രാജിവെച്ചതിന്​ പിന്നാലെയാണ് ന്യൂനപക്ഷ മന്ത്രാലയത്തിന്‍റെ അധിക ചുമതല കേന്ദ്ര വനിതാ ശിശുക്ഷേമ മന്ത്രി സ്മൃതി ഇറാനിക്ക് നൽകിയത്. നഖ്​വിക്കൊപ്പം രാജിവെച്ച ആർ.സി.പി. സിങ്ങിന്‍റെ ഉരുക്ക് മന്ത്രാലയത്തിന്‍റെ അധിക ചുമതല കേന്ദ്ര വ്യോമയാന മന്ത്രി ജ്യോതിരാദിത്യ സിന്ധ്യക്കും നൽകി.

രാജ്യസഭാ അംഗത്വം തീർന്നത്​ കൊണ്ടാണ്​ ഭരണഘടനാപരമായി രാജിവെക്കുന്നതെന്ന്​ നഖ്​വി വ്യക്​തമാക്കിയിരുന്നു. ഏറ്റവും പ്രബല ന്യൂനപക്ഷ വിഭാഗമായ മുസ്​ലിം സമുദായത്തിന്​ കേന്ദ്ര സർക്കാറിലുള്ള പ്രാതിനിധ്യമാണ്​ നഖ്​വിയുടെ രാജിയോടെ അവസാനിച്ചത്​.