വനിത ഇൻസ്പെക്ടറെ കൂട്ടബലാത്സം​ഗത്തിനിരയാക്കി: ബി.ജെ.പി മുൻ നേതാവിനെതിരെ കേസ്

മുൻ ബി.ജെ.പി നേതാവും കൂട്ടാളികളും ചേർന്ന് കൂട്ടബലാത്സംഗത്തിനിരയാക്കിയെന്ന പരാതിയുമായി വനിത സബ് ഇൻസ്പെക്ടർ. ഭിൽവാര ജില്ലയിലെ വനിതാ ഇൻസ്പെക്ടറായ യുവതിയാണ് പരാതിയുമായി എത്തിയത്.

ബി.ജെ.പി മുൻ നേതാവായ ബൻവാർ സിങ് പാലാരയും കൂട്ടാളികളും യുവതിയുടെ ഔദ്യോ​ഗിക വസതിയിൽ വച്ച് കൂട്ടബലാത്സം​ഗത്തിനിരയാക്കിയെന്നാണ് കേസ്. സംഭവത്തിൽ പ്രതികൾക്കെതിരെ ഇന്ത്യൻ ശിക്ഷാ നിയമത്തിലെ സെക്ഷൻ 376-ഡി ഉൾപ്പെടെയുള്ള വകുപ്പുകൾ പ്രകാരം എഫ്.ഐ.ആർ രജിസ്റ്റർ ചെയ്തതായി ബിൽവാര എസ്.പി ആദർശ് സിദ്ദു പറഞ്ഞു.

കേസിന്റെ അന്വേഷണം അഡീഷനൽ എസ്​ .പിക്ക്​ കൈമാറിയതായും അദ്ദേഹം അറിയിച്ചു. 2018ൽ സ്ഥലം മാറ്റവുമായി ബന്ധപ്പെട്ട് പലാരയെ സമീപിച്ചിരുന്നുവെന്നും സന്ദർശനത്തിനിടെ പൊലീസ് ലൈനിലെ തന്റെ ഔദ്യോ​ഗിക വസതിയിൽ വച്ച് കൂട്ടബലാത്സം​ഗത്തിനിരയാക്കുകയായിരുന്നുവെന്നും യുവതി പൊലീസിൽ മൊഴി നൽകി.

പലാരയുടെ ഭാര്യയും ബി.ജെ.പി മുൻ എം.എൽ.എയുമായ സുശീൽ കൻവർ പാലാര 2020 ഡിസംബറിൽ കോൺഗ്രസിന്റെ പിന്തുണയോടെ അജ്മീർ ജില്ല പ്രമുഖായി തെരഞ്ഞെടുക്കപ്പെട്ടിരുന്നു. പിന്നീട് ഇവരെ പാർട്ടി പുറത്താക്കിയിരുന്നു.