ഗർഭിണിയാകാൻ പൊക്കിൾകൊടി തിന്ന 19കാരിക്ക്​ ദാരുണാന്ത്യം; അന്വേഷണം

അമരാവതി​: ആന്ധ്രപ്രദേശിൽ ഗർഭിണിയാകാനായി പൊക്കിൾകൊടി തിന്ന 19കാരിക്ക്​ ദാരുണാന്ത്യം. നാദേന്ദ്​ലയിലെ തുബാഡു ഗ്രാമത്തിലാണ്​ സംഭവം.

ദാ​േച്ചപ്പള്ളി സ്വദേശിയാണ്​ യുവതി. മൂന്നുവർഷം മുമ്പ്​ തുബാഡു സ്വദേശിയായ രവിയെ യുവതി വിവാഹം കഴ​ിച്ചു. കുട്ടികളുണ്ടാകാത്തതിനെ തുടർന്ന്​ രണ്ടുവർഷത്തോളമായി പല നാടൻ മരുന്നുകളും യുവതി കഴിച്ചിരുന്നു. കൂടാതെ പൊക്കിൾകൊടി ഭക്ഷിച്ചാൽ ഗർഭിണിയാകുമെന്ന്​ നാട്ടുകാർ ചിലർ യുവതിയെ വിശ്വസിപ്പിക്കുകയും ചെയ്​തു.

ഇതേ തുടർന്ന്​ 19കാരി ഒരു നവജാത ശിശുവിന്‍റെ പൊക്കിൾകൊടി ശേഖരിക്കുകയും വ്യാഴാഴ്ച രാത്രി ഭക്ഷിക്കുകയുമായിരുന്നു. മണിക്കൂറുകൾക്കകം യുവതിക്ക്​ ശാരീരിക അസ്വസ്​ഥതകൾ ആരംഭിച്ചു. തുടർന്ന്​ നര​സറോപേട്ടിലെ സ്വകാര്യ ആശുപത്രിയിൽ പ്രവേശിപ്പിച്ചു. ചികിത്സയിലിരി​േക്ക വെള്ളിയാഴ്ച യുവതി മരിച്ചു.

യുവതിയുടെ മാതാവ്​ പൊലീസ്​ സ്​റ്റേഷനിൽ പരാതി നൽകി. മൃതദേഹം പോസ്റ്റ്​മോർട്ടത്തിനായി സർക്കാർ ആശുപത്രിയിലേക്ക്​ മാറ്റി. പോസ്​​റ്റ്​മോർട്ടത്തിന്​ ശേഷം മരണകാരണം വ്യക്തമായാൽ കൃത്യമായ നടപടി സ്വീകരിക്കുമെന്ന്​ പൊലീസ്​ അറിയിച്ചു.

ഗർഭിണിയാകാൻ പൊക്കിൾകൊടി ഭക്ഷിക്കുന്നത്​ അശാസ്​ത്രീയ​മാണെന്ന്​ ഗൈനക്കോളജിസ്റ്റ്​ ഡോ. കവിത പറഞ്ഞു. അന്തവിശ്വാസവും അറിവില്ലായ്​മയുമാണ്​ ഇത്തരം അശാസ്​ത്രീയ മാർഗങ്ങൾ സ്വീകരിക്കുന്നതെന്നും അവർ പറഞ്ഞു.