വനത്തിൽ​ ടെന്‍റുകെട്ടി താമസം, പുല്ലും പായലും കഴിച്ച്​ അതിജീവനം; ആറുമാസം മുമ്പ്​ കാണാതായ യുവതിയെ കണ്ടെത്തി

വാഷിങ്​ടൺ: യു.എസിലെ യൂട്ടയിൽനിന്ന്​ ആറുമാസം മുമ്പ്​ കാണാതായ 47കാരിയെ ക​ണ്ടെത്തി. വനത്തിനുള്ളിൽ ടെന്‍റിൽ തനിച്ച്​ താമസിച്ചിരുന്ന യുവതി പുല്ലും പായലും കഴിച്ചാണ്​ ജീവൻ നിലനിർത്തിയിരുന്നത്​. യുവതിയുടെ പേരു വിവരങ്ങൾ അധികൃതർ വെളിപ്പെടുത്തിയിട്ടില്ല.

കഴിഞ്ഞവർഷം നവംബർ 25നാണ്​ യുവതിയെ മലയിടുക്കിൽനിന്ന്​ കാണാതാകുന്നത്​. സ്​​പാനിഷ്​ ഫോർക്ക്​ മലയിടുക്കിലെ ഡയമണ്ട്​ ​േഫാർക്ക്​ പ്രദേശത്തുനിന്നാണ്​ കാണാതായത്​.

അടുത്തിടെ പൊലീസ്​ ഡ്രോൺ പറത്തി നടത്തിയ പരിശോധനയിൽ ടെന്‍റ്​ ശ്രദ്ധയിൽപ്പെടുകയായിരുന്നു. നവംബർ 25ന്​ പ്രദേശത്തുനിന്ന്​ യുവതിയുടെ കാർ ഉപേക്ഷിച്ച നിലയിൽ കണ്ടെത്തിയതിനെ തുടർന്നായിരുന്നു അ​േന്വഷണം. തുടർന്ന്​ വനത്തിനുള്ളിൽ നടത്തിയ പരിശോധനക്കിടെ യുവതിയെയും ടെന്‍റും കണ്ടെത്തുകയായിരുന്നു.

കൃത്യമായി ഭക്ഷണം കഴിക്കാത്തതിനാൽ യുവതി​യുടെ ശരീരഭാരം ഗണ്യമായി കുറഞ്ഞിരുന്നു. കൂടാതെ അവശനിലയിലുമായിരുന്നു. സമീപത്തെ പുഴയിൽനിന്ന്​ വെള്ളം ശേഖരിച്ച്​ ടെന്‍റിൽ സൂക്ഷിച്ചിരുന്നു. പായലും പുല്ലു​ം അടങ്ങിയ ഭക്ഷണവും യുവതിയുടെ ടെന്‍റിൽനിന്ന്​ കണ്ടെത്തി.

യുവതി സ്വയം ഇവിടെ ജീവിക്കാൻ തീരുമാനിച്ചതായിരിക്കാമെന്ന്​ അധികൃതർ പറയുന്നു. യുവതിയെ രക്ഷ​ാപ്രവർത്തകർ മാനസിക ആരോഗ്യ പരിശോധനക്കായി ആശുപത്രിയിൽ പ്രവേശിപ്പിച്ചു.