ഡൽഹിയിൽ കാർ ​ൈഡ്രവറും സുഹൃത്തും യാത്രക്കാരിയെ ബലാത്​സംഗം ചെയ്​തു

ന്യൂഡൽഹി: കാർ ഡ്രൈവറും സുഹൃത്തും ചേർന്ന്​ 19കാരിയായ യാത്രക്കാരിയെ ബലാത്​സംഗം ചെയ്​തു. ശനിയാഴ്​ച രാത്രി ഡൽഹി- ഹരിയാന അതിർത്തിയിലാണ്​ സംഭവം. 

ഗുഡ്​ഗാമിലെ മാളിൽ ജോലിക്കാരിയായ യുവതിയാണ്​ ബലാത്സംഗത്തിനിരയായത്​. കിഴക്കൻ ഡൽഹി സ്വദേശിയായ യുവതി രാത്രി 10.30 ഒാടെ ജോലി കഴിഞ്ഞ്​ ശങ്കർ ചൗക്കിലെത്തി കാർ വിളിക്കുകയായിരുന്നു. 30 രൂപക്ക്​ ഉത്തം നഗർ മെട്രോസ്​റ്റേഷനിൽ ഇറക്കാം എന്ന്​ ഡ്രൈവർ അറിയിച്ചതിനെ തുടർന്നാണ്​ യുവതി കാറിൽ കയറിയത്​.  അവിടെ നിന്ന്​ കിഴക്കൻ ഡൽഹിയിലേക്ക്​ മെട്രോ ട്രെയിനിൽ കയറാമെന്നായിരുന്നു യുവതിയുടെ കണക്ക്​ കൂട്ടൽ. 

കാറിൽ ഡ്രൈവറെ കൂടാതെ രണ്ടു പുരുഷൻമാർ കൂടിയുണ്ടായിരുന്നുവെന്ന്​ യുവതി പൊലീസിന്​ മൊഴി നൽകി. ഒരാൾ രജോക്രി അതിർത്തിയിൽ ഇറങ്ങി. കാറി​ൽ ഡ്രൈവറും സുഹൃത്തും മാത്ര​മായതോടെ യുവതിയെ പീഡിപ്പിക്കാൻ അവർ പദ്ധതിയിടുകയായിരുന്നു.  

പരിചയമില്ലാത്ത വഴിയിലേക്ക്​ കാർ തിരിഞ്ഞപ്പോൾ യുവതി സംശയം പ്രകടിപ്പിച്ചു. അതോടെ മിണ്ടാതിരുന്നില്ലെങ്കിൽ കൊന്നുകളയുമെന്ന്​ ഇരുവരും ഭീഷണി​െപ്പടുത്തിയെന്ന്​ യുവതി പറയുന്നു. ഭയന്നുപോയ യുവതിയെയും കൊണ്ട്​​ കാർ ഡൽഹി- ഹരിയാന അതിർത്തിയിലെ ഒറ്റപ്പെട്ട സ്​ഥല​ത്തെക്ക്​ പോവുകയും അവിടെവച്ച്​ ഡ്രൈവറും സുഹൃത്തും പീഡിപ്പിക്കുകയുമായിരുന്നു. 

തന്നെ മെട്രോ സ്​റ്റേഷനിൽ ഇറക്കി വിടണമെന്ന യുവതിയുടെ അഭ്യർഥന പ്രകാരം​ ഇവർ ദ്വാരക മെട്രോസ്​​റ്റേഷനിൽ ഇറക്കി വിട്ടു. രാത്രി 12.30 ആയതിനാൽ മെട്രോ അടച്ചിരുന്നു. തുടർന്ന്​ യുവതി സുഹൃത്തുക്കളെ വിളിച്ച്​ വിവരം പറയുകയായിരുന്നു. സുഹൃത്തുക്കളാണ്​ പൊലീസിൽ വിവരമറിയിച്ചത്​. പൊലീസ്​ പട്രോൾ സംഘം എത്തിയാണ്​ യുവതിയെ ആശുപത്രിയിൽ പ്രവേശിപ്പിച്ചത്​. 

കാറി​​െൻറ നമ്പർ ഒാർത്തിരുന്ന യുവതി നൽകിയ പരാതിയിൽ പൊലീസ്​ അന്വേഷണം നടത്തി പ്രതികളെ പിടികൂടി.