റെയിൽവേ സ്റ്റേഷനിൽ സ്ത്രീയുടെ മൃതദേഹം: മൂന്നു ബിഹാർ സ്വദേശികൾ പിടിയിൽ
text_fieldsമാലിന്യക്കുട്ടക്കുള്ളിൽ മൃതദേഹം കണ്ടെത്തിയപ്പോൾ (ഫയൽ ചിത്രം)
ബംഗളൂരു: ബൈയ്യപ്പനഹള്ളി റെയിൽവേ സ്റ്റേഷനിൽ മാലിന്യക്കുട്ടയിൽ കണ്ടെത്തിയ സ്ത്രീയുടെ മൃതദേഹം ഉത്തർപ്രദേശ് സ്വദേശിനിയുടേതാണ് തിരിച്ചറിഞ്ഞു. സംഭവത്തിൽ മൂന്ന് ബിഹാർ സ്വദേശികൾ പിടിയിലായി. കുറ്റകൃത്യത്തിൽ പങ്കുള്ള മറ്റു രണ്ടുപേർക്കായി തിരച്ചിൽ നടക്കുകയാണ്.
മുമ്പു നടന്ന സമാന കൊലപാതകങ്ങളുമായി ഈ കൊലപാതകത്തിന് ബന്ധമില്ലെന്നും പൊലീസ് അറിയിച്ചു. കഴിഞ്ഞ തിങ്കളാഴ്ച രാത്രി എട്ടോടെയാണ് 30 വയസ്സിനടുത്ത് പ്രായമുള്ള യുവതിയുടെ മൃതദേഹം റെയിൽവേ സ്റ്റേഷനിൽ കണ്ടെത്തിയത്.മൂന്നുപേർ ഓട്ടോയിലെത്തി റെയിൽവേ സ്റ്റേഷനിൽ മൃതദേഹമടങ്ങിയ വീപ്പ ഉപേക്ഷിക്കുന്ന സി.സി.ടി.വി ദൃശ്യങ്ങൾ റെയിൽവേ പൊലീസിന് ലഭിച്ചിരുന്നു. ഈ ദൃശ്യങ്ങൾ കേന്ദ്രീകരിച്ചായിരുന്നു അന്വേഷണം.
ജനുവരി നാലിന് യശ്വന്തപുര റെയിൽവേ സ്റ്റേഷനിലും പ്ലാസ്റ്റിക് വീപ്പയിൽ മൃതദേഹം കണ്ടെത്തിയിരുന്നു. എന്നാൽ, പ്രദേശത്തെ സി.സി.ടി.വി. കാമറ പ്രവർത്തിക്കാതിരുന്നതിനാൽ ദൃശ്യങ്ങൾ ലഭിച്ചില്ല. രണ്ടുമാസം കഴിഞ്ഞിട്ടും ഈ കേസിൽ തുമ്പുണ്ടായിട്ടില്ല.ഡിസംബർ ആറിന് മറ്റൊരു യുവതിയുടെ മൃതദേഹം ചാക്കിൽ കെട്ടിയ നിലയിൽ ബംഗാർപേട്ട്-ബൈയ്യപ്പനഹള്ളി ട്രെയിനിലെ കോച്ചിൽ കണ്ടെത്തിയ സംഭവത്തിലും സി.സി.ടി.വി ദൃശ്യങ്ങൾ ലഭിച്ചിരുന്നില്ല.
നഗരത്തിലെ പല റെയിൽവേ സ്റ്റേഷനുകളിൽ സുരക്ഷാ ഉദ്യോഗസ്ഥരുടെ ഇടപെടലുകൾ കാര്യക്ഷമമല്ലെന്ന് ആരോപണമുണ്ട്. മിക്ക സ്റ്റേഷനുകൾക്കും രണ്ടും മൂന്നും പ്രവേശനകവാടങ്ങൾ ഉണ്ടെങ്കിലും പ്രധാന കവാടങ്ങളിൽ മാത്രമാണ് സുരക്ഷസേനയുടെ സാന്നിധ്യമുള്ളത്.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.