സ്ത്രീവിരുദ്ധം​; ജെ.എൻ.യു സർക്കുലർ പിൻവലിക്കണ​മെന്ന്​ വനിത കമീഷൻ

ന്യൂഡൽഹി: ലൈംഗികാതിക്രമങ്ങൾക്കെതിരായ ബോധവത്​കരണവുമായി ബന്ധപ്പെട്ട്​ ഡൽഹി ജവഹർലാൽ നെഹ്​റു സർവകലാശാല പുറത്തിറക്കിയ സർക്കുലർ സ്ത്രീവിരുദ്ധമാണെന്നും പിൻവലിക്കണമെന്നും ദേശീയ വനിത കമീഷൻ. തങ്ങളുടെ ആൺസുഹൃത്തുക്കളുമായുള്ള സൗഹൃദത്തിന്​ എവിടെയാണ്​ അതിർവരമ്പ്​ വേണ്ടതെന്ന്​ പെൺകുട്ടികൾ മനസ്സിലാക്കണം എന്ന്​ ആവശ്യപ്പെടുന്ന സർക്കുലർ സ്ത്രീവിരുദ്ധമാണെന്ന്​ വനിത കമീഷൻ അധ്യക്ഷ രേഖ ശർമ ആരോപിച്ചു.

Also Read:ലൈംഗികാക്രമണങ്ങളുടെ ഉത്തരവാദിത്തം പെൺകുട്ടികൾക്ക്​ -ജെ.എൻ.യു സർക്കുലർ വിവാദത്തിൽ

എല്ലായ്​പ്പോഴും ഉപദേശം സ്​ത്രീകളോടു​ മാത്രമായി ഒതുങ്ങുന്നത്​ എന്തുകൊണ്ടാണെന്ന്​ ചോദിച്ച രേഖ ശർമ, ഇരയെ അല്ല അതിക്രമം കാണിക്കുന്നവരെ വേണം ബോധവത്​കരിക്കാനെന്ന്​ ചൂണ്ടിക്കാട്ടി. സർക്കുലർ പുറത്തിറക്കിയ ആഭ്യന്തരസമിതി ഇരയോട്​ അനു​ഭാവപൂർണ നിലപാട്​ സ്വീകരിക്കണമെന്നും അവർ ആവശ്യപ്പെട്ടു.

Also Read:'ജിഹാദി ഭീകരത'; ജെ.എൻ.യുവിലെ പുതിയ കോഴ്​സിനെ അഭിനന്ദിച്ച്​​ കേന്ദ്രം

ലൈംഗികാതിക്രമങ്ങളുമായി ബന്ധപ്പെട്ട്​ ജനുവരി 17ന്​ കൗൺസലിങ്​ നടത്തുമെന്ന്​ അറിയിച്ച്​ വാഴ്​സിറ്റി വെബ്​സൈറ്റിൽ പ്രസിദ്ധീകരിച്ച സർക്കുലറിലാണ്​ വിവാദ പരാമർശമുള്ളത്​. 'അടുത്ത സുഹൃത്തുക്കൾ ലൈംഗികാതിക്രമം നടത്തുന്നതായ ഒട്ടേറെ പരാതികൾ സമിതിക്ക്​ ലഭിക്കാറുണ്ട്​. ആൺകുട്ടികൾ പലപ്പോഴും സൗഹൃദത്തിന്‍റെ അതിർവരമ്പ്​ ലംഘിക്കാറുള്ളതായി കാണുന്നു. അതുകൊണ്ട്​ ഇത്തരം അതിക്രമങ്ങൾക്ക്​ ഇരയാകാതിരിക്കാൻ ആൺസൗഹൃദങ്ങൾക്കിടയിൽ വ്യക്തമായ അതിർവരമ്പ്​ ​വരക്കേണ്ടത്​​ എവിടെയാണെന്ന്​ പെൺകുട്ടികൾ മനസ്സിലാക്കേണ്ടതുണ്ട്​' -സർക്കുലർ വിവരിക്കുന്നു.