മോദി നുണയൻ, പിയൂഷ്​ ഗോയൽ കഴിവുകെട്ടവൻ– രാജ്​ താക്കറെ

ന്യൂഡൽഹി: നരേന്ദ്രുമോദിയെ പോലെ നുണയനായ പ്രധാനമന്ത്രി ഇതുവരെ ഉണ്ടായിട്ടില്ലെന്ന്​ നവനിർമാൺ സേന നേതാവ്​ രാജ്​ താക്കറെ. മോദി ജനങ്ങൾക്ക്​ വൻ വാഗ്​ദാനങ്ങൾ നൽകുകയും പിന്നീടത്​ മായ്​ച്ചുകളയുകയും ​ചെയ്യുകയാണ്​. എങ്ങനെയാണ്​ ഇത്തരത്തിൽ നുണ പറയാൻ അദ്ദേഹത്തിന്​ കഴിയുന്നതെന്നും രാജ്​ താക്കറെ ചോദിച്ചു. മുംബൈയിലെ എല്‍ഫിന്‍സ്റ്റണ്‍ റെയിൽവേ സ്​റ്റേഷനിലെ നടപ്പാലത്തിലുണ്ടായ അപകടത്തിൽ പ്രതികരിക്കുകയായിരുന്നു അദ്ദേഹം. അതേസമയം അപകടത്തിൽ ഒരാൾ കൂടി ഇന്ന് മരിച്ചതോടെ മരണസംഖ്യ 23 ആയി.

റെയിൽവേ മന്ത്രി പിയൂഷ്​ ഗോയൽ കഴിവുകെട്ടവനാണ്​. സുരേഷ്​ പ്രഭുവായിരുന്നു അതിലും ​നല്ലത്​. മുംബൈയിലെ റെയിൽ ഗതാഗത സൗകര്യങ്ങൾ മെച്ചപ്പെടുത്താതെ ബുള്ളറ്റ്​ ട്രെയിൻ നിർമാണ പദ്ധതിക്ക്​ ഒരു കല്ലുപോലും ഇടാൻ അനുവദിക്കില്ല. മോദിക്ക്​ ബുള്ളറ്റ്​ ട്രെയിൻ വേണമെങ്കിൽ അദ്ദേഹമത്​ ഗുജറാത്തിൽ പണിയ​െട്ട. മഹാരാഷ്​ട്രയിൽ ബുള്ളറ്റ്​ ട്രെയിൻ നിർമാണത്തിന്​ സുരക്ഷാസേനയെ ഉപയോഗിക്കുകയാണെങ്കിൽ അത്​ പ്രതിരോധിക്ക​ുമെന്നും​ രാജ്​ താക്കറെ പറഞ്ഞു.  

മുംബൈയില്‍ ആദ്യമായല്ല മഴപെയ്യുന്നത്. എന്നാല്‍ അപകടത്തിന് കാരണമായി റെയില്‍വെ പഴിക്കുന്നത് മഴയെ ആണെന്നും രാജ് താക്കറെ പറഞ്ഞു. ഇന്ത്യക്ക്​ പാകിസ്​താൻ പോലുള്ള ശത്രുക്കളോ തീവ്രവാദികളെ ആവശ്യമില്ല. ആളുകളെ കൊല്ലാന്‍ ഇന്ത്യന്‍ റെയില്‍വേ തന്നെ ധാരാളമാണെന്നും താക്കറെ പരിഹസിച്ചു. 

മുംബൈ ലോക്കല്‍ സ്‌റ്റേഷനുകളിലെ പ്രശ്‌നങ്ങള്‍ ചൂണ്ടിക്കാണിച്ച് ഒക്ടോബര്‍ അഞ്ചിന് ചർച്ച്​ ഗേറ്റിലെ വെസ്​റ്റേൺ റെയിൽവേ ​ഹെഡ്​ക്വാ​േട്ടഴ്​സിലേക്ക്​ പ്രതിഷേധ റാലി നടത്തും. ലോക്കൽ റെയിൽ സംവിധാനവുമായി ബന്ധപ്പെട്ട പരാതികളും നിർദേശങ്ങളുമടങ്ങുന്ന പട്ടിക അതേദിവസം റെയില്‍വേക്ക്​ കൈമാറും.സമയപരിധിക്കുള്ളില്‍ ഇക്കാര്യങ്ങളിൽ മാറ്റംകൊണ്ടുവന്നില്ലെങ്കിൽ എന്താണ് സംഭവിക്കുകയെന്ന് അപ്പോള്‍ കാണാമെന്നും താക്കറെ പറഞ്ഞു. 

റെയില്‍വെ സ്റ്റേഷനുകളിലെ നടപ്പാലങ്ങളിലെ അനധികൃത വ്യാപാരികളെ പുറത്താക്കാന്‍ റെയില്‍വെ അധികൃതര്‍ക്ക് സമയപരിധി നല്‍കുമെന്നും അതിനുള്ളില്‍ അവരെ ഒഴിപ്പിച്ചില്ലെങ്കില്‍ അക്കാര്യം തങ്ങള്‍ സ്വയം സ്വയം നടത്തുമെന്നും അദ്ദേഹം മുന്നറിയിപ്പ്​ നൽകി.