കോവിഡ്​ ​രോഗി 'മരിച്ചു' ഒന്നല്ല, രണ്ടുതവണ; ആശുപത്രിക്കെതിരെ ബന്ധുക്കൾ

ഭോപാൽ: മധ്യപ്രദേശിൽ 58കാരനായ കോവിഡ്​ രോഗിയെ ആശുപത്രി അധികൃതർ രണ്ട്​ തവണ തെറ്റായി മരിച്ചുവെന്ന്​ പ്രഖ്യാപിച്ചതിൽ പ്രതിഷേധവുമായി ബന്ധുക്കൾ. മധ്യപ്രദേശിലെ വിദിഷ ജില്ലയിലെ അടൽ ബിഹാരി മെഡിക്കൽ കോളജിലാണ് ​സംഭവം.

രണ്ട്​ തവണയാണ്​ ബന്ധുക്കൾ ഗൗരിലാൽ കോരിയുടെ മൃതദേഹം സംസ്​കരിക്കുന്നതിനായി ഒരുക്കങ്ങൾ നടത്തിയിരുന്നത്​.

കോവിഡ്​ ബാധ സംശയിച്ച്​ കോരിയെ തിങ്കളാഴ്​ചയാണ്​ ആശുപത്രിയിൽ പ്രവേശിപ്പിച്ചത്​. ആരോഗ്യനില വഷളായതിനെ തുടർന്ന്​ ബുധനാഴ്ച വെന്‍റിലേറ്ററിലാക്കി.

'പിറ്റേ ദിവസം അച്ഛന്‍റെ നില മോശമാണെന്ന്​ പറഞ്ഞ്​ ആശുപത്രിക്കാർ വിളിപ്പിച്ചു. ആശുപത്രിയിലത്തിയ എന്നോട്​ അദ്ദേഹത്തെ രക്ഷിക്കാനായില്ലെന്ന്​ പറഞ്ഞു. അൽപ സമയത്തിന്​ ശേഷം നഴ്​സ്​ തന്നെ അദ്ദേഹം വീണ്ടും ശ്വസിച്ച്​ തുടങ്ങിയതായി അറിയിച്ചു' - രോഗിയുടെ മകനായ കൈലാശ്​ കോരി പറഞ്ഞു.

അതേദിവസം തന്നെ ഡോക്​ടർമാരുടെ നിർദേശാനുസരണം ഇദ്ദേഹത്തെ ശസ്​ത്രക്രിയക്ക്​ വിധേയനാക്കി.

'അച്ഛൻ ശസ്​ത്രക്രിയക്കിടെ മരിച്ചതായി അവർ പിന്നീട്​ പറഞ്ഞു. വൈകീട്ട്​ 8.30ന്​ ശസ്​ത്രക്രിയക്കിടെ അദ്ദേഹത്തിന്​ കോവിഡ്​ സ്​ഥിരീകരിച്ചതായി അറിയിച്ചു. അതിനാൽ നിങ്ങൾക്ക്​ മൃതദേഹം വിട്ടുതരില്ലെന്നും അവർ പറഞ്ഞു' -കേരിയുടെ മകൻ മാധ്യമപ്രവർത്തകരോട്​ പറഞ്ഞു.

വെള്ളിയാഴ്ച രാവിലെ കുടുംബം മൃതദേഹം സംസ്​കരിക്കുന്നതിനായി ഒരുക്കങ്ങൾ നടത്തുന്നതിനിടെ ആശുപത്രി ജീവനക്കാർ രോഗി ജീവനോടെയുണ്ടെന്നും എന്നാൽ വെന്‍റിലേറ്ററിന്‍റെ സഹായത്തോടെയാണ്​ ജീവൻ നിലനിർത്തുന്നതെന്നും അറിയിച്ചു.

'അദ്ദേഹം മരിച്ചതായി രണ്ടു​തവണയാണ്​ അവർ അറിയിച്ചത്​. ഇത്​ നിരുത്തരവാദിത്തപരമായ നടപടിയാണ്' ​ൈകലാഷ്​ കോരി പറഞ്ഞു.

'കോരി വെന്‍റിലേറ്ററിലായിരുന്നു. പെട്ടെന്ന് അദ്ദേഹത്തിന്‍റെ ഹൃദയമിടിപ്പ്​ നിന്നു. ഒരു നഴ്‌സ് അദ്ദേഹം മരിച്ചതായി പ്രഖ്യാപിച്ചു. സാധാരണയായി, ഡോക്ടർമാർ അത്തരം കേസുകളിൽ രോഗിയെ രക്ഷിക്കാൻ പരമാവധി ശ്രമിക്കും. ചിലപ്പോൾ ഒന്ന്​ രണ്ട്​ മണിക്കൂർ എടുക്കും. ഞങ്ങളുടെ ഡോക്ടർമാർ അദ്ദേഹത്തെ ജീവിതത്തിലേക്ക്​ തിരികെ കൊണ്ടുവന്നു… ഇതെല്ലാം ആശയക്കുഴപ്പമുണ്ടാക്കി' -ആശുപത്രി ഡീനായ ഡേ. സുനിൽ നന്ദേശ്വർ പറഞ്ഞു.​