സ്ത്രീകളുടെ നമസ്കാര മുറിയില്‍ അതിക്രമം; യുവാവ് അറസ്റ്റില്‍

മംഗളൂരു: ഉള്ളാൾ പൊലീസ് പരിധിയിൽ തലപ്പാടിക്കടുത്ത് തൊക്കോട് ജുമാമസ്ജിദ് വളപ്പിലെ സ്ത്രീകളുടെ പ്രാര്‍ഥന മുറിയില്‍ അതിക്രമം നടത്തിയ യുവാവിനെ പൊലീസ് അറസ്റ്റ് ചെയ്തു. കാര്‍ക്കള നിട്ടെ സ്വദേശി സുജിത്ത് ഷെട്ടിയെയാണ് (26) അറസ്റ്റ് ചെയ്തത്.

സ്ത്രീകൾ നല്‍കിയ പരാതിയുടെ അടിസ്ഥാനത്തിലാണ് സുജിത്ത് ഷെട്ടിക്കെതിരെ കേസെടുത്തത്. പരാതി നല്‍കിയ യുവതിയും മറ്റ് രണ്ട് സ്ത്രീകളും വ്യാഴാഴ്ച രാത്രി 11.30ന് തൊക്കോട്ടെ ഹുദ ജുമാമസ്ജിദ് സംഘടിപ്പിച്ച പ്രത്യേക ചടങ്ങില്‍ പങ്കെടുക്കാനെത്തിയിരുന്നു.

ചടങ്ങിനിടെ മൂന്ന് സ്ത്രീകളും ഏപ്രില്‍ 29ന് പുലര്‍ച്ച രണ്ടുമണിക്ക് മസ്ജിദ് വളപ്പിലെ സ്ത്രീകളുടെ മുറിയില്‍ പ്രാർഥന നടത്തുമ്പോള്‍ സുജിത് ഷെട്ടി പ്രാര്‍ഥന മുറിയില്‍ അതിക്രമിച്ചുകയറി അപമര്യാദയായി പെരുമാറിയെന്നാണ് കേസ്. പൊലീസ് അന്വേഷണത്തെത്തുടര്‍ന്ന് ഒളിവില്‍പോയ പ്രതി ഇന്നലെയാണ് പിടിയിലായത്.