തെലങ്കാന വാഴാൻ റെഡ്​ഡി കുടുംബത്തിൽനിന്ന്​ അവൾ വരുന്നു...​

ഹൈദരാബാദ്​: 2021 ഫെബ്രുവരി 20നായിരുന്നു, ആന്ധ്രപ്രദേശ്​ മുൻമുഖ്യമന്ത്രിയുടെ മകൾ 47കാരിയായ വൈ.എസ്​. ശർമിള തെലങ്കാനയിൽ പുതിയ പാർട്ടി രൂപവത്​കരണത്തിന്​ രണ്ടാംവട്ട ചർച്ചകൾക്ക്​ തുടക്കമിടുന്നത്​. ഒരു വയസ്സ്​ മൂത്ത സഹോദരൻ ​വൈ.എസ്.​ ജഗൻ മോഹൻ റെഡ്​ഡി അയൽ സംസ്​ഥാനമായ ആന്ധ്രപ്രദേശിൽ യുവജന ശ്രമിക റിഥു കോൺഗ്രസ്​ എന്ന പാർട്ടിക്ക്​ രൂപംനൽകി വിജയം വരിച്ചതിന്‍റെ ആവേശത്തിലാണ്​ തെലങ്കാനയിൽ 'വൈ.എസ്​.ആർ ഭരണ ദർശനങ്ങളെ' സാക്ഷാത്​കരിക്കാൻ ശർമിള ഒരുങ്ങുന്നത്​.

2023 ലെ നിയമസഭ തെരഞ്ഞെടുപ്പിന്​ മുമ്പായി രാഷ്​ട്രീയ പ്രവേശം രാജകീയമാക്കലാണ്​ വൈ.എസ്​.ആർ പുത്രിയുടെ ആദ്യ നടപടി. തെരഞ്ഞെടുപ്പിൽ ഒരു വശത്ത്​ കോൺഗ്രസും ബി.ജെ.പിയും മറുവശത്ത്​ തെലങ്കാന രാഷ്​ട്ര സമിതിയും തമ്മിൽ ത്രികോണ മത്സരമാണ്​. നിലവി​െല ഭരണത്തോടുള്ള അസംതൃപ്​തി കൂട്ടുപിടിച്ച്​ അധികാരം പിടിക്കാ​െമന്ന്​ ശർമിള കണക്കുകൂട്ടുന്നു. പിതാവി​നോടുള്ള ഒടുങ്ങാത്ത ജനകീയ അഭിനിവേശവും തുണയാകും. 2009ൽ ഹെലികോപ്​റ്റർ തകർന്നായിരുന്നു പിതാവിന്‍റെ ദാരുണ വിയോഗം. അതിപ്പോഴും പാവപ്പെട്ടവന്‍റെ മനസ്സിനെ മഥിക്കുന്ന ചിന്തയായി കിടപ്പുണ്ട്​. ക്രിസ്​ത്യൻ വോട്ടുകൾ പൂർണമായി ഒപ്പമുണ്ടാകും (സംസ്​ഥാന ജനസംഖ്യയിൽ എട്ടു ശതമാനമാണ്​ ക്രിസ്​ത്യൻ പ്രാതിനിധ്യം). കോൺഗ്രസ്​ നേതൃത്വത്തിൽ അജയ്യരായി വാണ റെഡ്​ഡി കുടുംബത്തിലേറെയും ഒപ്പമുണ്ടാകുമെന്ന്​ ശർമിള കണക്കുകൂട്ടുന്നു.

പാർട്ടിയുടെ പേര്​ വൈ.എസ്​.ആർ തെലങ്കാന കോൺഗ്രസ്​ എന്നാകാനാണ്​ സാധ്യത. തെലങ്കാനയിൽ 'ഉറങ്ങിപ്പോയ', സഹോദരന്‍റെ വൈ.എസ്​.ആർ കോൺഗ്രസിൽ നിന്ന്​ നേരിയ വ്യത്യാസം. സംസ്​ഥാനത്തിന്‍റെ പ്രത്യേക പദവിയോടുള്ള ഇഷ്​ടക്കുറവും ആന്ധ്രപ്രദേശുമായി നദീജലം പങ്കിടുന്നതിലെ അഭിപ്രായ വ്യത്യാസവുമുൾപെടെ വിഷയങ്ങളിൽ വൈ.എസ്​.ആർ കോൺഗ്രസ്​ നിലപാട്​ തെലങ്കാനയ​ുടെ താൽപര്യങ്ങളെ മാനിക്കുന്നില്ലെന്നതാണ്​ പ്രശ്​നം.

സഹോദരങ്ങൾക്കിടയിലെ പോരും പ്രധാന വിഷയമാണ്​. 2019ൽ ജറൂസലം സന്ദർശനം കഴിഞ്ഞു മടങ്ങിയ ശേഷം ജഗനും ശർമിളയും മുഖാമുഖം കണ്ടിട്ടുപോലുമില്ല. വൈ.എസ്​.ആർ കോൺഗ്രസിനും സഹോദരനും വേണ്ടി മുമ്പ്​ തെരഞ്ഞെടുപ്പ്​ ഗോദയിൽ സജീവമായിരുന്നു ശർമിള. 2012-13 കാലത്ത്​ സി.ബി.ഐ, ഇ.ഡി വകുപ്പുകൾ എടുത്ത അഴിമതി/അനധികൃത ആസ്​തി കേസിൽ ജഗൻ ജയിലിലായപ്പോൾ വിശേഷിച്ചും. കേസുകൾ ഇപ്പോഴും കോടതിയിൽ വിധി കാത്തുകിടപ്പാണ്​. അദ്ദേഹത്തിനെതിരെ കുറ്റം ചുമത്തപ്പെടാൻ സാധ്യതയും കൂടുതൽ. അങ്ങനെ സംഭവിച്ചാൽ, പാർട്ടി ചുമതല ഭാര്യ ഭാരതിക്ക്​ ലഭിക്കാനാണ്​ സാധ്യത. നിലവിൽ പാർട്ടി ചുമതലകളില്ലാത്ത ഭാരതി, തെലുഗു ദിനപത്രവും ടെലിവിഷൻ ചാനലുമായ സാക്ഷി ഉൾ​െപടെ കുടുംബ വ്യവസായത്തിൽ മാത്രമാണ്​ ശ്രദ്ധയൂന്നുന്നത്​.

ജഗൻ 2012ൽ അറസ്റ്റിലായപ്പോൾ ശർമിള സഹോദരനു വേണ്ടി ഒരു പദയാത്ര നടത്തിയിരുന്നു. 2019 ലോക്​സഭ, നിയമസഭ തെരഞ്ഞെടുപ്പ്​ കാലത്ത്​ അവർ മാത്രമല്ല, മാ​താവ്​ വിജയമ്മയു​ം വൈ.എസ്​.ആർ.സിക്കായി സജീവ പ്രചാരണ രംഗത്തുണ്ടായിരുന്നു. എന്നാൽ, ആന്ധ്രപ്രദേശ്​ രാഷ്​ട്രീയത്തിൽ ഇടമില്ലെന്ന്​ മനസ്സിലാക്കിയ ശർമിളയിപ്പോൾ തന്നെ വിളിക്കുന്നത്​, 'തെലങ്കാനയുടെ മരുമകൾ' എന്നാണ്​. ബ്രാഹ്​മണ കുടുംബത്തിൽ പിറന്ന്​ ക്രിസ്​ത്യനായി മാറിയ ഭർത്താവ്​ അനിൽ കുമാർ തെലുഗു സംസാരിക്കുന്ന സംസ്​ഥാനങ്ങളിൽ അറിയപ്പെട്ട സുവിശേഷ പ്രവർത്തകനാണ്​, രാഷ്​ട്രീയത്തിൽ ഒട്ടും സജീവമല്ല താനും.

എന്നാൽ, വൈ.എസ്​.ആറിന്‍റെ പാത പിന്തുടർന്ന്​ ജന മനസ്സ്​ അറിയാൻ ശർമിള പദയാത്രയുമായി വീണ്ടും എത്തുമെന്നാണ്​ കണക്കുകൂട്ടൽ. പഴയ വൈ.എസ്​.ആർ രണ്ടാംകിട നേതാക്കൾ പലരും രാഷ്​ട്രീയത്തിൽ ഊഴം കാത്ത്​ തെലങ്കാനയിൽ ഉറക്കം കളഞ്ഞ്​ കാത്തിരിക്കുന്നുണ്ടെന്ന്​ അനുയായികൾ പറയുന്നു. അവർക്കു വേണേൽ ശർമിളയുടെ രാഷ്​ട്രീയ സംരംഭത്തിന്‍റെ ഭാഗമാകാമെന്നാണ്​ വാഗ്​ദാനം. 'രാജണ്ണ രാജ്യം തിരികെ കൊണ്ടുവരലാണ്​ എന്‍റെ ലക്ഷ്യം'- ഹൈദരാബാദിലെ വീട്ടിൽ തടിച്ചുകൂടിയ അനുയായികളോട്​ അവർ പറയുന്നു. പാർട്ടി പ്രതിനിധികളെ കണ്ട്​ ബോധ്യപ്പെടുത്തിയ ശേഷം രാഷ്​ട്രീയ പാർട്ടി പ്രഖ്യാപിക്കാനാണ്​ ​ശ്രമം.

എന്നാൽ, അനിൽ കുമാറുമായി ചേർന്ന്​ 'മത പരിവർത്തനം സംഘടിപ്പിക്കുകയാണ്​' ശർമിളയെന്നാണ്​ ചില എതിരാളികളുടെ ആക്ഷേപം. ഏ​പ്രിൽ 10ന്​ ​ഒരു യോഗം വിളിച്ചിട്ടുണ്ടെന്ന്​ വൈ.എസ്​.ആർ.സി തെലങ്കാന മുൻ സംസ്​ഥാന പ്രസിഡന്‍റായിരുന്ന കൊണ്ട രാഘവ റെഡ്​ഡി പറയുന്നു. ജില്ലാതല നേതാക്കളുമായി അന്ന്​ ശർമിള ചർച്ച നടത്തും. തന്‍റെ പദ്ധതികൾ യോഗത്തിൽ ശർമിള വിശദീകരിക്കും. വൈ.എസ്​.ആർ ജന്മദിന വാർഷികമായ ജൂ​െലെയിൽ പുതിയ പാർട്ടി രൂപവത്​കരിക്കുമെന്ന പ്രഖ്യാപനവും അന്ന്​ ഉണ്ടായേക്കും.