ജഗന്‍റെ ജാമ്യം റദ്ദാക്കാൻ ആവശ്യപ്പെട്ട വെ.എസ്​.ആർ കോൺഗ്രസ്​ എം.പിയെ രാജ്യദ്രോഹക്കേസിൽ അറസ്റ്റ്​ ചെയ്​തു

ഹൈദരാബാദ്​: ആന്ധ്ര മുഖ്യമന്ത്രി ജഗന്‍മോഹന്‍ റെഡ്ഡിക്കെതിരെ പരസ്യ നിലപാട് എടുത്ത് പാര്‍ട്ടിയില്‍ നിന്ന്​ വിമതസ്വരം ഉയര്‍ത്തുന്ന എംപിയാണ് രഘുരാമ കൃഷ്​ണ രാമരാജു. അനധികൃത സ്വത്തുസമ്പാദനക്കേസില്‍ വൈ.എസ്​. ജഗന്‍മോഹന്‍ റെഡ്ഡിക്ക് അനുവദിച്ച ജാമ്യം റദ്ദാക്കണമെന്നാവശ്യപ്പെട്ട് കോടതിയെ സമീപിച്ച എം.പിയെ രാജ്യദ്രോഹക്കുറ്റം ചുമത്തി അറസ്റ്റ്​ ചെയ്​തിരിക്കുകയാണ്​ ആന്ധ്രപ്രദേശ്​​ ക്രിമിനൽ ഇൻവസ്റ്റിഗേഷൻ ഡിപാർട്​മെന്‍റ്​ (സി.ഐ.ഡി).

നരസപുരത്തുനിന്നുള്ള എംപിയാണ് ഇദ്ദേഹം. സംസ്ഥാന സർക്കാറിന്‍റെ അന്തസ്സിന് കളങ്കം വരുത്തിയെന്ന്​ ആരോപിച്ചാണ്​ രാജുവിനെ ഹൈദരാബാദിലെ വസതിയിൽ നിന്ന് അറസ്റ്റ് ചെയ്തതെന്ന്​ വാർത്താ ഏജൻസിയായ എ.എൻ.ഐ റിപ്പോർട്ട്​ ചെയ്​തു. രാജ്യദ്രോഹം, വ്യത്യസ്​ഥ വിഭാഗങ്ങൾക്കിടയിൽ സ്​പർധയുണ്ടാക്കൽ എന്നീ വകുപ്പുകൾ ചേർത്താണ്​ നടപടി.

ചില സമുദായങ്ങൾക്കെതിരെ വിദ്വേഷ പ്രസംഗങ്ങൾ നടത്തിയതിനും സർക്കാരിനെതിരെ അസംതൃപ്തി വളർത്തിയതിനുമാണ്​ രാജുവിനെ അറസ്റ്റ്​ ചെയ്​തതെന്ന്​ പൊലീസ്​ പ്രസ്താവിച്ചു. 59കാരനായ രാമരാജു സർക്കാറിനെതിരെ അഴിമതിയാരോപണങ്ങൾ ഉന്നയിച്ചിരുന്നു.

2012ലെ അനധികൃത സ്വത്തുസമ്പാദനക്കേസില്‍ ജഗന്‍മോഹന്‍ റെഡ്ഡിക്ക് അനുവദിച്ച ജാമ്യം റദ്ദാക്കണമെന്നാവശ്യപ്പെട്ട് ഏപ്രിൽ 27നാണ്​ രാമരാജു സി.ബി.ഐ പ്രത്യേക കോടതിയെ സമീപിച്ചത്​. മുഖ്യമന്ത്രി ജാമ്യവ്യവസ്​ഥകൾ തെറ്റിച്ചെന്നായിരുന്നു ആരോപണം.

വെസ്റ്റ്​ ഗോദാവരി ജില്ലയിലെ പ്രമുഖ വ്യവസായിയായ രാമരാജു ആദ്യമായല്ല ജഗനെതിരെ തിരിയുന്നത്​. 2014 ലോക്​സഭ തെരഞ്ഞെടുപ്പിൽ ടിക്കറ്റ്​ ലഭിക്കാത്തതിൽ പ്രതിഷേധിച്ച്​ അദ്ദേഹം പാർട്ടി വിട്ട്​ ബി.ജെ.പിയിലേക്ക്​ കൂടുമാറിയിരുന്നു. 2018ൽ ബി.ജെ.പി വിട്ട്​ തെലുഗുദേശം പാർട്ടിയിലെത്തിയെങ്കിലും 2019 ലോക്​സഭ തെരഞ്ഞെടുപ്പിന്​ മുമ്പ്​ വൈ.എസ്​.ആർ.സി.പിയിൽ മടങ്ങിയെത്തി.

ലോക്​സഭ തെരഞ്ഞെടുപ്പിൽ വിജയിച്ചെങ്കിലും രാമരാജുവും ജഗനും തമ്മിൽ സ്വരചേർച്ചയുണ്ടായില്ല. 2020ൽ പാർട്ടി രാമരാജുവിന്​ കാരണം കാണിക്കൽ നോട്ടീസ് ന​ൽകി. പാർട്ടിയിൽ നിന്ന്​ സസ്​പെൻഡ്​ ചെയ്​തില്ലെങ്കിലും ഇയാളെ അയോഗ്യനാക്കണമെന്ന്​ പാർട്ടി കഴിഞ്ഞ ഒക്​ടോബറിൽ സ്​പീക്കർ ഓം ബിർലയോട്​ ആവശ്യപ്പെട്ടിരുന്നു.