ആര്​ രാജ്യം വിടണമെന്ന്​ തീരുമാനിക്കേണ്ടത്​ മോദിയല്ല- മമത

കൊൽക്കത്ത: ദേശീയ പൗരത്വ പട്ടിക വിഷയത്തിൽ പ്രധാനമന്ത്രി നരേന്ദ്രമോദിക്കെതിരെ ആഞ്ഞടിച്ച്​ ബംഗാൾ മുഖ്യമന്ത ്രി മമത ബാനർജി. ആര്​ രാജ്യം വിടണമെന്നും ആരെല്ലാം നിലനിൽക്കണമെന്നും തീരുമാനിക്കേണ്ടത്​ മോദിയല്ല. ബംഗാളിൽ ദേശീയ പൗരത്വ പട്ടിക നടപ്പാക്കാൻ സമ്മതിക്കില്ല. നരേന്ദ്രമോദി ഭരണഘടനയെ ധിക്കരിച്ചുകൊണ്ടാണ്​ ഇത്തരം കാര്യങ്ങൾ ചെയ്യുന്നതെന്നും മമത വിമർശിച്ചു.

ചായക്കാരൻ, അദ്ദേഹം നൽകിയ വാഗ്​ദാനങ്ങൾ പാലിക്കുന്നതിൽ പരാജയപ്പെട്ടു. ഇപ്പോൾ കാവൽക്കാരനായി ജനങ്ങളെ വിഡ്​ഢികളാക്കുകയാണെന്നും മമത പരിഹസിച്ചു. ബംഗാളിലെ കൂച്ച്​ ബെഹറിൽ നടന്ന റാലിയിൽ സംസാരിക്കുകയായിരുന്നു അവർ.

2018 ജൂലൈ 30നാണ്​ കേന്ദ്രസർക്കാർ ദേശീയ പൗരത്വ പട്ടിക പുറത്തിറക്കിയത്​. ഇത്​ പ്രകാരം അസമിലെ നാല്​ ദശലക്ഷം ജനങ്ങൾക്ക്​ പൗരത്വം നഷ്​ടമായിരുന്നു. ജനങ്ങൾ സ്വന്തം രാജ്യത്ത്​ അഭയാർത്ഥികളാകുന്നത്​ അനുവദിക്കില്ലെന്ന്​ മമത അന്ന്​ തുറന്നടിച്ചിരുന്നു.