10​ വർഷം തുടർച്ചയായി ജയിലിൽ; ഭാര്യയുടെ ഹരജി പരിഗണിച്ച് നിരന്തര കുറ്റവാളി​ക്ക് പരോൾ അനുവദിച്ച്​ ഹൈകോടതി

കൊച്ചി: നിരന്തര കുറ്റവാളി​യായതിനാൽ തുടർച്ചയായി 10​ വർഷത്തിലേറെ തടവിൽ കഴിഞ്ഞയാൾക്ക്​ പരോൾ അനുവദിച്ച്​ ഹൈകോടതി. ജാമ്യമില്ലാതെ തടവി​ൽ കഴിഞ്ഞ കാലയളവിന്‍റെ ദൈർഘ്യവും ഇക്കാ​ലത്തെ നല്ല നടപ്പും കണക്കിലെടുത്താണ്​ കണ്ണൂർ സെൻട്രൽ ജയിലിൽ കഴിയുന്ന തൃശൂർ സ്വദേശിയായ തോമസ്​ എന്ന ടോണിക്ക്​ ജസ്റ്റിസ്​ സിയാദ്​ റഹ്​മാൻ 15 ദിവസത്തെ പരോൾ അനുവദിച്ചത്​. പരോൾ ആവശ്യപ്പെട്ട്​ ഭാര്യ നൽകിയ ഹരജിയിലാണ്​ ഉത്തരവ്​.

​കൊലപാതകമടക്കം ​കേസുകളിൽ പ്രതിയായ ടോണിക്ക്​ സെഷൻസ്​ കോടതി പരോളില്ലാതെ തുടർച്ചയായി 20 വർഷത്തെ തടവാണ്​ വിധിച്ചതെങ്കിലും ഇടതടവില്ലാതെ തടവ്​ അനുഭവിക്കണമെന്ന വ്യവസ്ഥ ഹൈകോടതി നേരത്തേ റദ്ദാക്കിയിരുന്നു. 10 വർഷവും ഏഴു​ മാസവും തടവ്​ പൂർത്തിയാക്കിയിട്ടും ഒരു തവണപോലും പരോൾ അനുവദിച്ചിട്ടില്ലെന്നും ജാമ്യം അനുവദിക്കണമെന്നും ആവശ്യപ്പെട്ടാണ്​ ഭാര്യ കോടതിയെ സമീപിച്ചത്​. എന്നാൽ, നിരന്തര കുറ്റവാളി​യായതിനാൽ ഹരജിക്കാരിയുടെ ഭർത്താവിന്​ നിയമപ്രകാരം ജാമ്യം അനുവദിക്കാനാവില്ലെന്ന്​ പ്രോസിക്യൂഷൻ വാദിച്ചു. അതേസമയം, ജയിലിലെ ​ഇയാളുടെ പെരുമാറ്റം തൃപ്​തികരമായ രീതിയിലാണെന്നും വ്യക്തമാക്കി.

ജീവപര്യന്തം തടവുശിക്ഷക്ക്​ വിധിക്കപ്പെട്ട പ്രതി 10​ വർഷം പരോളില്ലാതെ ശിക്ഷ അനുഭവിച്ചതായി കോടതി ചൂണ്ടിക്കാട്ടി. ഇത്ര നീണ്ട കാലയളവിനിടയിൽ ഒരു തവണപോലും ​പരോൾ അനുവദിച്ചിട്ടില്ലെന്നിരിക്കെ ഇക്കാര്യത്തിൽ മാനുഷിക പരിഗണന നൽകേണ്ടതുണ്ട്​. ഇത്രയും നീണ്ട തടവ്​ നിരന്തര കുറ്റവാളിയെന്ന വസ്തുതയുടെ പ്രാധാന്യം അൽപം കുറച്ചിട്ടുണ്ട്​. ജയിലിനകത്തെ പെരുമാറ്റം മാനസാന്തരത്തിന്‍റെ സൂചനയുമാകാം. അതിനാൽ പ്രതിക്ക്​ ഒരു അവസരം നൽകേണ്ടതുണ്ടെന്ന്​ വ്യക്തമാക്കിയ കോടതി സെപ്റ്റംബർ അഞ്ച്​ മുതൽ 21വരെ പരോൾ അനുവദിച്ച്​ ഉത്തരവിട്ടു. പരോളിന്​ മതിയായ ഉപാധികൾ വെക്കാമെന്നും കണ്ണൂർ സെൻട്രൽ ജയിൽ സൂപ്രണ്ടിന്​ കോടതി നിർ​ദേശം നൽകി.