പോപുലര്‍ ഫിനാന്‍സിനെതിരെ ​​15 കേസ്​; ലഭിച്ചത്​ നൂറ്റമ്പതിലേറെ പരാതി

കോഴിക്കോട്: നിക്ഷേപ തട്ടിപ്പ് നടത്തിയ പോപുലര്‍ ഫിനാന്‍സിനെതിരെ ജില്ലയില്‍ 15 കേസുകള്‍ രജിസ്​റ്റര്‍ ചെയ്തു. കസബ, ചേവായൂര്‍​, നടക്കാവ്, വടകര തുടങ്ങിയ സ്‌റ്റേഷനുകളിലാണ് കേസ്​ രജിസ്​റ്റർ ചെയ്​തത്​. വിവിധ സ്​റ്റേഷനുകളിലായി ഇതിനകം നൂറ്റമ്പതോളം പരാതികൾ ലഭിച്ചതിനാൽ വരുംദിവസങ്ങളിൽ കൂടുതൽ കേസുകൾ രജിസ്​റ്റർ ​െചയ്യും​. ഇതുവരെ ലഭിച്ച പരാതിയിൽ ജില്ലയില്‍ മാത്രം അഞ്ചുകോടി രൂപയെങ്കിലും നിക്ഷേപകര്‍ക്ക് നഷ്​ടമായിട്ടുണ്ടെന്നാണ് പ്രാഥമിക കണക്ക്.

പരാതി നല്‍കിയവരില്‍നിന്ന് മൊഴിയെടുത്ത ശേഷമാണ് കേസുകൾ രജിസ്​റ്റര്‍ ചെയ്യുന്നത്. ചേവായൂര്‍ പൊലീസിലാണ് ഏറ്റവും കൂടുതല്‍ നിക്ഷേപകര്‍ പരാതിയുമായെത്തിയത്. മലാപ്പറമ്പ്​ ബ്രാഞ്ചിൽ പണം നിക്ഷേപിച്ചതുമായി ബന്ധപ്പെട്ട്​ 70ലേറെ പരാതികളാണ്​ ലഭിച്ചതെന്നും ഏഴ്​ കേസുകൾ രജിസ്​റ്റർ ചെയ്​തതായും ചേവായൂർ സി.​െഎ ടി.പി​. ശ്രീജിത്ത്​ പറഞ്ഞു. കല്ലായി റോഡ്​, മീഞ്ചന്ത, നടക്കാവ്​, പെരുവയൽ, വടകര, കുണ്ടുകുളം, വെസ്​റ്റ്​ഹിൽ എന്നിവിടങ്ങളിലാണ്​ ജില്ലയിൽ ഇവരുടെ മറ്റു ബ്രാഞ്ചുകൾ പ്രവർത്തിച്ചതെന്നാണ്​ പൊലീസ്​ പറയുന്നത്. ​

പരാതികളില്‍ ഒറ്റ എഫ്‌.ഐ.ആര്‍ മതിയെന്ന്​ പൊലീസ്​ മേധാവി ലോക്​നാഥ്​ ബെഹ്​​റ നേരത്തേ നിര്‍ദേശിച്ചിരുന്നെങ്കിലും ഓരോ പരാതിക്കും പ്രത്യേക കേസും എഫ്‌.ഐ.ആറും വേണമെന്നാണ് ഹൈകോടതി ഉത്തരവിട്ടത്​. ഇതോടെയാണ്​ പരാതികൾ പത്തനംതിട്ട പൊലീസിന് കൈമാറുന്നതൊഴിവാക്കി പരാതി ലഭിക്കുന്ന സ്‌റ്റേഷനുകളില്‍ തന്നെ കേസ് രജിസ്​റ്റര്‍ ചെയ്യാന്‍ തീരുമാനിച്ചത്. സംസ്ഥാനത്തെ വിവിധയിടങ്ങളിലെ ബ്രാഞ്ചുകൾ വഴി പോപുലർ ഫിനാൻസ്​ കോടിക്കണക്കിന്​ രൂപയുടെ നിക്ഷേപം സ്വീകരിച്ച്​ തട്ടിപ്പ്​ നടത്തിയ സംഭവത്തിൽ പത്തനംതിട്ട പൊലീസാണ്​ ആദ്യം കേസ്​ രജിസ്​റ്റർ ചെയ്​തത്്.​ പിന്നാലെയാണ്​ വിവിധയിടങ്ങളിൽനിന്ന്​ പരാതി ഉയരാൻ തുടങ്ങിയതും കേസുകൾ രജിസ്​റ്റർ ​ചെയ്​തതും.