കടുത്ത നിയന്ത്രണങ്ങൾക്കിടയിലും പ്ലസ്​ ടു പരീക്ഷയെഴുതിയത്​ 1.6 ലക്ഷം വിദ്യാർഥികൾ

തിരുവനന്തപുരം: ലോക്​ഡൗണിന്​ സമാനമായ നിയന്ത്രണം നടപ്പാക്കിയ ദിനത്തിലും പ്ലസ്​ ടു പരീക്ഷ തടസ്സങ്ങളില്ലാതെ നടന്നു. കോവിഡ്​ വ്യാപന സാഹചര്യത്തിൽ ശനിയാഴ്​ചയും ഞായറാഴ്​ചയുമാണ്​ സംസ്ഥാനത്ത്​ കർശന നിയന്ത്രണം നടപ്പാക്കുന്നത്​.

ഇത്​ ശനിയാഴ്​ചയിലെ പ്ലസ്​ ടു പരീക്ഷ നടത്തിപ്പിനെ ബാധിക്കുമെന്ന ആശങ്ക ഉയർന്നിരുന്നു. അക്കൗണ്ടൻസി, ജ്യോഗ്രഫി, സോഷ്യൽ വർക്ക്, മ്യൂസിക്, ജിയോളജി വിഷയങ്ങളിലാണ് ശനിയാഴ്​ച പരീക്ഷ നടന്നത്. സയൻസ് സ്ട്രീമിന് പരീക്ഷ ഇല്ലാത്തതിനാലും അക്കൗണ്ടൻസി, ജ്യോഗ്രഫി ഒഴികെയുള്ള വിഷയങ്ങളിൽ പരീക്ഷയെഴുതുന്നവരുടെ എണ്ണം കുറവായതിനാലും വിദ്യാർഥികളുടെ തിരക്ക് കുറവായിരുന്നു. 1.6 ലക്ഷം വിദ്യാർഥികളാണ്​ പരീക്ഷ എഴുതാനെത്തിയത്​.

പൊതുഗതാഗത സൗകര്യം പരിമിതമായിരുന്നതിനാൽ സ്വകാര്യ വാഹനങ്ങളിലാണ് കൂടുതൽ വിദ്യാർഥികളും പരീക്ഷക്കെത്തിയത്. പല പരീക്ഷ കേന്ദ്രങ്ങളിലേക്കും കെ.എസ്​.ആർ.ടി.സി സർവിസ്​ നടത്തി. കുട്ടികൾക്കൊപ്പമെത്തിയ രക്ഷാകർത്താക്കൾ പരീക്ഷാകേന്ദ്രത്തിൽ കൂട്ടംകൂടി നിൽക്കാതെ മടങ്ങി പരീക്ഷ കഴിയുമ്പോൾ തിരിച്ചെത്തിയാൽ മതിയെന്ന് മുഖ്യമന്ത്രി നിർദേശിച്ചിരുന്നെങ്കിലും പലയിടത്തും ഇത്​ പാലിക്കപ്പെട്ടില്ല. സ്കൂൾ പരിസരത്ത് കാത്തുനിന്ന രക്ഷാകർത്താക്കൾ പരീക്ഷക്കുശേഷം കുട്ടികളെയും കൂട്ടിയാണ്​ മടങ്ങിയത്. തിങ്കളാഴ്​ച പ്ലസ് ടു പരീക്ഷ അവസാനിക്കും. 28ന് പ്രാക്ടിക്കൽ പരീക്ഷ ആരംഭിക്കും. പ്രാക്ടിക്കൽ പരീക്ഷ മാറ്റണമെന്ന ആവശ്യം വിദ്യാഭ്യാസ വകുപ്പ്​ അംഗീകരിച്ചിട്ടില്ല. അതെസമയം, വിദ്യാർഥികളുടെയും അധ്യാപകരുടെ ആരോഗ്യസുരക്ഷക്കാവശ്യമായ മുൻകരുതലുകളോടെയായിരിക്കും പ്രാക്​ടിക്കൽ പരീക്ഷ നടത്തിപ്പെന്ന്​ പരീക്ഷ സെക്രട്ടറി ഡോ. എസ്​.എസ്.​ വിവേകാനന്ദൻ അറിയിച്ചു. ഒരു ഉപകരണം ഒന്നിൽ കൂടുതൽ വിദ്യാർഥികൾ ഉപയോഗിക്കാത്ത വിധമുള്ള ക്രമീകരണം കൊണ്ടുവരാൻ​ ധാരണയായിട്ടുണ്ട്​. പരീക്ഷ നടത്തിപ്പ്​ കൂടുതൽ ലളിതമാക്കും.