സിൽവർ ലൈനിനെതിരെ 19 എം.പിമാർ കേന്ദ്രത്തിനു മുന്നിൽ; എം.പിമാരുടെ കത്തിൽ ഒപ്പിടാതെ തരൂർ

ന്യൂഡൽഹി: എതിർപ്പു തള്ളി കേരള സർക്കാർ നടപ്പാക്കാൻ ശ്രമിക്കുന്ന കെ റെയിൽ സിൽവർ ലൈൻ അർധ അതിവേഗ പാതക്കെതിരെ 19 എം.പിമാർ ഒപ്പിട്ട പരാതി കേന്ദ്രസർക്കാറിന്​ മുന്നിൽ. ഇതേത്തുടർന്ന്​ ​എല്ലാ എം.പിമാരെയും റെയിൽവേ മന്ത്രി അശ്വിനി വൈഷ്​ണവ്​ ബുധനാഴ്​ച ചർച്ചക്ക്​ വിളിച്ചു.

സംസ്​ഥാന സർക്കാറി​െൻറ സമ്മർദമുണ്ടായിട്ടും പല കാരണങ്ങളാൽ പദ്ധതിക്ക്​ അനുമതി നൽകാൻ കേന്ദ്രം മടിക്കുന്നതിനിടയിലാണ്​ പുതിയ സംഭവവികാസം. കേരളത്തിലെ 18 എം.പിമാരും നിർദിഷ്​ടപാത കടന്നു പോകുന്നുവെന്നു പറയുന്ന മാഹി ഉൾപ്പെടുന്ന പോണ്ടിച്ചേരിയിൽ നിന്നുള്ള ലോക്​സഭാംഗവും ഒപ്പിട്ട കത്താണ്​ റെയിൽവേ മന്ത്രിക്ക്​ മുന്നിലെത്തിയിരിക്കുന്നത്​. ഇതു മുൻനിർത്തി ബുധനാഴ്​ച വൈകീട്ട്​ മൂന്നിനാണ്​ ചർച്ച.

കേരളത്തിൽ നിന്നുള്ള എം.പിമാരിൽ സി.പി.എമ്മിലെ എ.എം. ആരിഫ്​, ഇടതുമു​ന്നണിയിലേക്ക്​ മാറിയതിനാൽ കേ​രള കോൺഗ്രസിലെ തോമസ്​ ചാഴികാടൻ, കോൺഗ്രസ്​ നേതാക്കളായ രാഹുൽ ഗാന്ധി, ശശി തരൂർ, എ.കെ. ആൻറണി എന്നിവർ ഒഴികെ എല്ലാവരും കത്തിൽ ഒപ്പുവെച്ചിട്ടുണ്ട്​. പദ്ധതിയെ എതിർക്കുന്നതിനെക്കുറിച്ച്​ പഠിക്കാനുണ്ടെന്ന വിശദീകരണത്തോടെയാണ്​ ശശി തരൂർ മാറി നിന്നത്​. മറ്റ്​ അസൗകര്യങ്ങൾ കാരണമാണ്​ രാഹുലും ആൻറണിയും ഒപ്പുവെക്കാതെ പോയത്​.

കൊടിക്കുന്നിൽ സുരേഷ്​ എം.പിയാണ്​ കത്തുമായി റെയിൽവേ മന്ത്രിയെ കണ്ടത്​. കേരളത്തിലെ എം.പിമാരുടെ അഭിപ്രായം കൂടി കണക്കിലെടുത്തു മാത്രമെ പദ്ധതിയുടെ കാര്യത്തിൽ റെയിൽവേ അന്തിമ തീരുമാനമെടുക്കൂ എന്ന്​ കൊടിക്കുന്നിൽ സുരേഷിനെ റെയിൽവേ മന്ത്രി അറിയിച്ചു. ബുധനാഴ്​ചത്തെ ചർച്ചയുടെ തുടർച്ചയായി പ്രധാനമന്ത്രി നരേന്ദ്രമോദി, ധനമന്ത്രി നിർമല സീതാരാമൻ, പരിസ്​ഥിതി മന്ത്രി ഭൂപേന്ദർ യാദവ്​, നിതി ആയോഗ്​ ഉപാധ്യക്ഷൻ രാജീവ്​ കുമാർ എന്നിവരെയും സമീപിക്കുമെന്ന്​ കൊടിക്കുന്നിൽ പറഞ്ഞു.

സി​​ൽവർ ലൈൻ കേരളത്തി​െൻറ പരിസ്​ഥിതിക്കും സാഹചര്യങ്ങൾക്കും പറ്റിയതല്ലെന്നും സംസ്​ഥാന സർക്കാറി​െൻറ നീക്കം ദുരുദ്ദേശ്യപരമാണെന്നും റെയിൽവേ മന്ത്രിയെ കൊടിക്കുന്നിൽ സുരേഷ്​ അറിയിച്ചു.

ഇതിനിടെ, കെ റെയിലി​െൻറ പദ്ധതി രൂപരേഖ കെട്ടുകഥയും കോപ്പിയടിയുമാണെന്ന്​ പ്രാഥമിക സാധ്യത പഠനം നടത്തിയ സംഘത്തെ നയിച്ച അലോക്​ വർമ സ്വകാര്യ ടി.വി ചാനലിനോട്​ പറഞ്ഞു. പ്രകൃതിക്ഷോഭ സാധ്യതകൾ, ഭൂഘടന തുടങ്ങിയതൊന്നും പഠിച്ചിട്ടില്ല. സ്​റ്റേഷനുകളും മറ്റും തീരുമാനിച്ചത്​ കൃത്രിമമായ വിശദ പദ്ധതി റിപ്പോർട്ട്​ (ഡി.പി.ആർ) വെച്ചാണ്​. ഡൽഹി മെട്രോ റെയിൽ കോർപറേഷൻ തയാറാക്കിയ ബുള്ളറ്റ്​ ട്രെയിൻ പദ്ധതി റിപ്പോർട്ടി​െൻറ ഏകദേശ രൂപം കോപ്പിയടിക്കുകയാണ്​ ചെയ്​തിരിക്കുന്നത്​. പദ്ധതിരേഖ പരസ്യപ്പെ​ടുത്തേണ്ടതുണ്ടെന്നും അദ്ദേഹം പറഞ്ഞു.