ജിഷയുടെ അമ്മയെ കാണാനെത്തുന്നവരുടെ ലക്ഷ്യം പബ്ലിസിറ്റി മാത്രം- കലക്ടര്‍

കൊച്ചി: പെരുമ്പാവൂരില്‍ കൊല്ലപ്പെട്ട ജിഷയുടെ അമ്മ രാജേശ്വരിയെ കാണാന്‍ ആശുപത്രിയിലെത്തുന്നവരില്‍ പലരുടെയും ലക്ഷ്യം പബ്ലിസിറ്റി മാത്രമാണെന്ന് എറണാകുളം ജില്ലാ കലക്ടര്‍ എം.ജി.രാജമാണിക്യം. ഫോട്ടോഗ്രഫറെയോ വിഡിയോഗ്രാഫറെയോ കൂട്ടിയാണ് മിക്കവരും ആശുപത്രിയില്‍ എത്തുന്നത്. മറ്റുചിലര്‍ തര്‍ക്കത്തിനും സമൂഹമാധ്യമങ്ങളിലെ കുറ്റപ്പെടുത്തലുകള്‍ക്കുമായി നില്‍ക്കുന്നു. പത്തുദിവസത്തേക്ക് ഈ ആവേശം ഉണ്ടാകും. അതുകഴിഞ്ഞാല്‍ ഈ ബഹളമുണ്ടാക്കുന്നവരാരും ആ അമ്മയേയും കുടുംബത്തേയും തിരിഞ്ഞുനോക്കാത്ത അവസ്ഥയാകും ഉണ്ടാകുക. ഫേസ്ബുക്കിലൂടെയായിരുന്നു കലക്ടറുടെ വിമർശം.

കുടുംബത്തിന് സാമ്പത്തിക സഹായം ലഭ്യമാക്കാമെന്ന് ഏറ്റവർക്കായി എറണാകുളം ജില്ലാ കലക്ടറും ജിഷയുടെ അമ്മ രാജേശ്വരിയും
ചേർന്ന് ആരംഭിച്ച ജോയിന്റ് അക്കൗണ്ട് ഉപയോഗപ്പെടുത്തണമെന്നും കലക്ടർ അഭ്യർത്ഥിച്ചു.

അക്കൗണ്ട് നമ്പർ: 35748602803
പേര്: The District Collector, Ernakulam &Mrs.K.K.Rajeswari
ഐഎഫ്എസ്‌സി: SBIN0008661
മോഡ് ഓഫ് ഓപ്പറേഷൻ: ജോയിന്റ് ഓപ്പറേഷൻ
ബാങ്ക്: സ്റ്റേറ്റ് ബാങ്ക് ഓഫ് ഇന്ത്യ, പെരുമ്പാവൂർ

രാജേശ്വരിയെ കാണാനെത്തുന്ന സന്ദര്‍ശകരെ നിയന്ത്രിക്കണമെന്ന് ആശുപത്രി സൂപ്രണ്ട് ഡോ. സുമ അറിയിച്ചിരുന്നു.  ജിഷയുടെ അമ്മക്ക് വിശ്രമം അനിവാര്യമാണെന്നും അവർ വ്യക്തമാക്കി. രാജേശ്വരിക്ക് മാനസിക സമ്മര്‍ദ്ദം താങ്ങാന്‍ കഴിയുന്നില്ല. ഈ സാഹചര്യത്തില്‍ അവരെ ബുദ്ധിമുട്ടിക്കരുതെന്നും വിശ്രമം അനുവദിക്കണമെന്നും ഡോക്ടര്‍മാര്‍ നിർദേശിച്ചു.