തിരുവനന്തപുരത്ത് വിദ്യാര്‍ഥിനിയെ വീട്ടില്‍ കയറി കുത്തിപ്പരിക്കേല്‍പ്പിച്ചു

കണിയാപുരം: തിരുവനന്തപുരം കണിയാപുരത്ത് വിദ്യാര്‍ഥിനിയെ മൂന്നംഗ സംഘം  വീട്ടില്‍ കയറി കുത്തിപ്പരിക്കേല്‍പ്പിച്ചു. കഴിഞ്ഞ ദിവസം വൈകിട്ട് ഏഴു മണിയോടെയായിരുന്നു സംഭവം. ബൈക്കിലെത്തിയ അക്രമികള്‍ വീടിന്‍െറ മതില്‍ ചാടിക്കടന്ന് അകത്ത് കയറുകയും മാരകായുധം ഉപയോഗിച്ച് പെണ്‍കുട്ടിയുടെ വയറ്റില്‍ കുത്തുകയുമായിരുന്നു. സഹോദരി നിലവിളിച്ചതോടെ ഇവര്‍ കടന്നുകളഞ്ഞു.

തുടര്‍ന്ന് കഠിനംകുളം പൊലീസ് നടത്തിയ അന്വേഷണത്തില്‍ പെരുമാതുറ സ്വദേശികളായ മൂന്ന് പേർ പിടിയിലായി. മോഷണ ശ്രമത്തിനിടെയാണ് ആക്രമണമെന്നും ഇവര്‍ കഞ്ചാവ് ലഹരിയിലായിരുന്നെന്നുമാണ് പൊലീസ് പറയുന്നത്. മുമ്പും ഇവര്‍ നിരവധി മോഷണം നടത്തിയതായി സമ്മതിച്ചിട്ടുണ്ട്. കണിയാപുരം ഭാഗത്ത് മോഷണം പതിവാണെന്നും പൊലീസ് നടപടിയെടുക്കുന്നില്ലെന്നും നാട്ടുകാര്‍ പരാതിപ്പെട്ടിരുന്നു.