പിറന്നാൾ മധുരമായി 'മധുരരാജ'; മമ്മൂട്ടിക്ക് വ്യത്യസ്ത സമ്മാനവുമായി എട്ടു കുട്ടികൾ

കൊച്ചി: മെഗാസ്​റ്റാർ മമ്മൂട്ടിക്ക് വ്യത്യസ്തമായൊരു പിറന്നാൾ സമ്മാനം ഒരുക്കിയിരിക്കുകയാണ്​ ഈ കുട്ടികൾ. മമ്മൂട്ടിയുടെ ആറടി ഉയരമുള്ള ചിത്രമാണ്​ ഇവർ എട്ടുപേർ ചേർന്ന്​ തയാറാക്കിയിരിക്കുന്നത്​. ലോക്ഡൗൺ കാലമായതിനാൽ എട്ടുപേരും സ്വന്തം വീടുകളിലിരുന്ന്​ ചിത്രത്തി​െൻറ ഓരോ ഭാഗങ്ങൾ വരക്കുകയായിരുന്നു. മമ്മൂട്ടിയുടെ ഹിറ്റ്​ ചിത്രമായ 'മധുരരാജ'യിലെ കഥാപാത്രത്തെയാണ്​ ഇവർ വരച്ചത്​.

വിദ്യാർഥികളായ സൂരജ് കിരൺ, അമൽ മാത്യു, സിദ്ധാർഥ്​ എസ്. പ്രശാന്ത്, പ്രണവ് കെ. മനോജ്, വസുദേവ് കൃഷ്ണൻ, ഗേബൽ സിബി, ആദിയ നായർ, ഗൗരി പാർവതി എന്നിവരാണ് ഈ ഉദ്യമത്തിന്​ പിന്നിൽ. ഇവരുടെ ചിത്രകലാ അധ്യാപികയായ സീമ സുരേഷ്​ എല്ലാത്തിനും മേൽനോട്ടം വഹിച്ചു.

ആഗസ്​റ്റ്​ 15ന് 'ആർട്ട് ഇൻ ആർട്ടി'​െൻറ നേതൃത്വത്തിൽ കുട്ടികളുടെ ഓൺലൈൻ ചിത്രപ്രദർശനം നടത്തിയിരുന്നു. കേരളമടക്കം ഇന്ത്യയുടെ വിവിധ ഭാഗങ്ങളിൽ നിന്നും ദുബൈ, അബൂദബി, ഖത്തർ, ജോർജിയ, ഉഗാണ്ട, സിഡ്​നി, സാമ്പിയ എന്നിവിടങ്ങളിൽ നിന്നുമുള്ള 35 കുട്ടികളുടെ ചിത്രങ്ങളാണ്​ പ്രദർശിപ്പിച്ചത്​. മമ്മൂട്ടിയാണ്​ അന്ന്​ പ്രദർശനം ഉദ്ഘാടനം ചെയ്തത്. ഇതി​െൻറ നന്ദിസൂചകമായി ഒരുമിച്ച് ചിത്രം വരയ്ക്കാമെന്ന ആശയം ഈ കുട്ടികൾ പ്രാവർത്തികമാക്കുകയായിരുന്നു. പിറന്നാൾ ദിനത്തിൽ ചിത്രം മമ്മൂട്ടിക്ക്​ സമ്മാനിക്കണമെന്നാണ് ഈ കുട്ടികളുടെ ആഗ്രഹം.