വിഴിഞ്ഞത്തിന്‍റെ പേരി​​ലൊരു അവകാശത്തർക്കം

വിഴിഞ്ഞം തുറമുഖം ആരുടെ കുഞ്ഞ്​? ഭരണപക്ഷം പറയുന്നു​ അവരുടേതെന്ന്​.​ വിട്ടുകൊടുക്കാൻ യു.ഡി.എഫ്​ തയാറുമല്ല. ധനാഭ്യർഥന ചർച്ചയിൽ ഇരുപക്ഷവും അവകാശത്തിനായി വീറോടെ വാദിക്കുന്നുണ്ടായിരുന്നു. അടുത്ത തെരഞ്ഞെടുപ്പിലെ തുറുപ്പുചീട്ടാണ്​ വിഴിഞ്ഞമെന്ന്​​ ഇരുകൂട്ടർക്കുമറിയാം. വിഴിഞ്ഞം മുടക്കാൻ പ്രതിപക്ഷം ശ്രമിച്ചുവെന്ന ആരോപണവുമായി കടകംപള്ളി സുരേന്ദ്രനാണ്​ വെടിപൊട്ടിച്ചത്​.

പ്രാദേശിക പ്രശ്നത്തിന്‍റെ പേരിൽ പൊലീസ്​ സ്​​റ്റേഷൻ അക്രമവും വെടിവെപ്പ്​​ ഉണ്ടാകാൻ ആഗ്രഹിച്ചതും അത്​ വഴി രണ്ടാം വിമോചനസമരം ലക്ഷ്യംവെച്ചതും പ്രതിപക്ഷമാണെന്നായി കടകംപള്ളി. പദ്ധതി തന്നെ നടപ്പാക്കിയത്​ തങ്ങളെന്ന്​ പറഞ്ഞ എ. വിൻസെന്‍റ്​ കടകംപള്ളിയുടെ ആരോപണം തള്ളി. സി.പി.എം സംസ്ഥാന സെക്രട്ടേറിയറ്റിൽ അംഗമാക്കാത്തതിന്​ ഞങ്ങളുടെ മുകളിൽ കയറുന്നത്​ എന്തിനെന്നായി കടകംപള്ളിയോട്​ വിൻസെന്‍റ്​. കടകംപള്ളിക്ക്​ മുമ്പ്​ സംസാരിച്ചിരുന്ന ആവേശം ഇപ്പോൾ കാണുന്നില്ലെന്ന്​ എ.പി. അനിൽകുമാറിനും തോന്നി.

7500 കോടിയുടെ പദ്ധതിയിൽ 6000 കോടിയുടെ അഴിമതി ആരോപിച്ചത്​ അനിൽകുമാർ ഓർത്തു. ആ കുഞ്ഞിന്‍റെ പിതാവ്​ നിങ്ങളാണ്​ എന്നാണ്​ ഇപ്പോൾ പറയുന്നു. ഞങ്ങളുടെ പദ്ധതി നന്നായി പോകുന്നതിൽ സന്തോഷം. വിഴിഞ്ഞം ഇടതുമുന്നണിയുടെ കുഞ്ഞാണെന്ന്​ പി.എസ്​. സുപാലും വാദിച്ചു. വി.എസ്​ മുഖ്യമന്ത്രി ആയപ്പോഴാണ്​ ആദ്യ ടെൻഡർ നടന്നത്​. ചൈനീസ്​​ കമ്പനിയാണെന്ന്​ പറഞ്ഞ്​ മുടക്കിയത്​ എ.കെ. ആന്‍റണി അംഗമായ കേന്ദ്ര സർക്കാറാണ്​. വിഴിഞ്ഞത്തിന്‍റെ പ്രധാന നടപടികൾ പൂർത്തിയാക്കത്​ വി.എസ്​ സർക്കാറാണെന്ന്​​ പി. മമ്മിക്കുട്ടിയും.

പൃതൃത്വം ഏറ്റെടുക്കാൻ ഉമ്മൻ ചാണ്ടി സർക്കാറിനോ യു.ഡി.എഫിനോ കഴിയില്ലെന്ന്​ കെ. ആൻസലൻ. വിഴിഞ്ഞത്തിന്‍റെ പിതൃത്വം ഏറ്റെടുക്കുന്ന ഇടതുപക്ഷം കരുവന്നൂരിന്‍റെ പൃതൃത്വമെങ്കിലും ഞങ്ങൾക്ക്​ വിട്ടുതന്നതിൽ നന്ദിയുണ്ടെന്ന്​ സണ്ണി ജോസഫും പരിഹസിച്ചു. പൾവാൾദേവന്‍റെ പട്ടാഭിഷേക സമയത്ത്​ ജനങ്ങളുടെ ആരവം മുഴങ്ങിയത്​​ ബാഹുബലിക്ക്​ വേണ്ടിയായിരുന്നുവെന്ന്​ പി.സി. വിഷ്ണുനാഥ്​ ഓർമിപ്പിച്ചു. നിങ്ങൾ എന്തെല്ലാം ന്യായവാദങ്ങൾ നിരത്തിയാലും മലയാളികളുടെ മനസ്സിൽ പതിയാൻ പോകുന്ന ഒരേയൊരു പേര്​ ഉമ്മൻ ചാണ്ടിയുടേതായിരിക്കും. അത്​ മറയ്ക്കാൻ ശ്രമിച്ചാൽ കൂടുതൽ അപമാനിക്കപ്പെടും.

പാവപ്പെട്ട ആശ വർക്കമാർമാരെ പാട്ടപെറുക്കികൾ, കൃമി കീടങ്ങൾ എന്നൊക്കെ വിളിച്ചിട്ട്​ അപ്പുറത്തോട്ട്​ മാറിനിന്ന്​ ‘മനുഷ്യനാകണം, മനുഷ്യനാകണം... ഉയർച്ച താഴ്​ചകൾക്കതീതമായ സ്​നേഹമേ...’ എന്ന്​ പാടുകയാണെന്ന്​ പി.സി. വിഷ്ണുനാഥ്​. മന്ത്രിമാർ പറയുന്നത്​ കേട്ടിട്ട്​ ഇത്​ മാവേലിയുടെ രാജസദസ്സെന്ന്​ എ.പി. അനിൽകുമാറിന്​ തോന്നി. ഒരു പ്രശ്നവുമില്ല. എല്ലാവരും സംതൃപ്തർ​. നല്ല രീതിയിൽ ജീവിക്കുന്നു. എല്ലാം സുഭിക്ഷം. ഇതാണോ യഥാർഥ ചിത്രം? ആശ സമരമടക്കം മറുവശം കൂടി അനിൽകുമാർ വരച്ചുകാട്ടി.

വർത്തമാനം മാത്രമേയുള്ളൂ എല്ലാം വളരെ മോശമാണെന്ന്​ മഞ്ഞിളാംകുഴി അലി. നിക്ഷേപങ്ങൾക്ക്​ അനുകൂല സാഹചര്യമാണ്​ സംസ്ഥാനത്ത്​, അതിനെ പി.ആർ വർക്കായി ചിത്രീകരിക്കുന്നത്​ കഷ്ടമെന്ന്​ സുജിത്​ വിജയൻ പിള്ള. അരി മില്ലുടമയോട്​ കാണിക്കുന്ന താൽപര്യം കർഷകരോട്​ കാണിക്കുന്നില്ലെന്ന്​ കുറുക്കോളി മൊയ്​തീൻ. പിച്ച തന്നില്ലെങ്കിലും വേണ്ടില്ല പട്ടിയെ വിട്ട്​ കടിപ്പിക്കരുതെന്ന്​ പ്രതിപക്ഷത്തോട്​ പി. മമ്മിക്കുട്ടി പറഞ്ഞു.

വികസന കാര്യങ്ങളിൽ പ്രതിപക്ഷം പിന്തുണ നൽകണമെന്നില്ല, എന്നാൽ കേരളം പിന്നിലാണെന്ന രീതിയിൽ പറഞ്ഞുനടക്കരുതെന്നായി അദ്ദേഹത്തിന്‍റെ ഉപദേശം. മാപ്രകളുടെ ഊർജം കൊണ്ട്​ കനഗൊലുവിന്‍റെ നുണബോംബുകൾ പൊട്ടിച്ച്​ കേരള മുന്നേറ്റം തടയാൻ നോക്കേണ്ട എന്ന്​ കെ. ബാബു (നെന്മാറ). ഇനി തിങ്കളാഴ്​ച മാത്രമേ സഭ ചേരൂവെന്നതിനാൽ പലരും നേരത്തെ സ്ഥലം വിട്ടിരുന്നു.