ഔന്നത്യം എളിമയാക്കിയ മഹത്​ വ്യക്​തിത്വം

ഔന്നത്യം എന്നത്​ എളിമയാണെന്ന്​ മാധ്യമത്തെ, മാധ്യമത്തിലെ ജീവനക്കാ​രെ പഠിപ്പിച്ച മഹാനായിരുന്നു സിദ്ദീഖ്​ സാഹിബ്​ എന്ന്​ എല്ലാവരും ബഹുമാനത്തോടെ വിളിക്കുന്ന ​പ്രൊഫ. കെ.എ സിദ്ദീഖ്​ ഹസൻ. ഒരേ സമയം മാധ്യമത്തിന്‍റെ രക്ഷിതാവും ഉടമയും ജീവനക്കാരനും ജീവനും തന്നെയായിരുന്നു അദ്ദേഹം. മാധ്യമത്തിന്‍റെ പ്രസാധകരായ ഐഡിയൽ പബ്ലിക്കേഷൻ ട്രസ്റ്റ്​ സെക്രട്ടറി, പിന്നീട്​ ചെയർമാൻ എന്നീ നിലകളിൽ പ്രവർത്തിക്കു​േമ്പാൾ അ​ദ്ദേഹത്തിന്‍റെ ഹൃദയ താളം മാധ്യമം തന്നെയായിരുന്നു.

ഏൽപിക്കപ്പെട്ട ദൗത്യത്തിന്‍റെ പൂർത്തീകരണത്തിായി ജീവാർപ്പണം ചെയ്യുക എന്നത്​ അക്ഷരാർഥത്തിൽ ജീവിതം കൊണ്ട്​ തെളിയിച്ചാണ്​ അദ്ദേഹം ഈ ലോകത്തോട്​ വിടപറഞ്ഞത്​. ആശുപത്രിയിലാണെന്നറിഞ്ഞ്​ പോയി കാണാൻ ആഗ്രഹിച്ചിരുന്നെങ്കിലും സാഹചര്യങ്ങൾ വിലക്കുകയായിരുന്നു. അവധിയെടുത്തു വീട്ടിലിരിക്കെയാണ്​ വിവരം കേട്ടത്​. ഉടനെ അവസാന നോക്കിനായി പുറപ്പെ​ട്ടെങ്കിലും ഖബറക്കം ബുധനാഴ്ച രാവിലെയാണെന്നറിഞ്ഞതോടെ, യാത്ര അടുത്ത ദിവസത്തേക്ക്​ നീട്ടിവെക്കണോ എന്നൊരാലോചന വന്നെങ്കിലും, മനസ്സിന്‍റെ ആഴത്തിൽ പതിഞ്ഞു കിടക്കുന്ന എളിമ തുളുമ്പുന്ന ആ മുഖം അസാധാരണമാംവണ്ണം പിടിച്ചു വലിക്കുന്നതു പോ​ലെ തോന്നി. ആ കാന്തിക ശക്​തിയിൽ യാത്ര തുടർന്നു. ജീവിച്ചിരിക്കെ ആ പുഞ്ചിരി ​വെട്ടത്തിൽ വന്നവരെല്ലാം വിവരമറിഞ്ഞ ഉടനെ അവസാന നോക്കിനായി പ്രവഹിച്ചതും ആ കാന്തിക ബലത്തിലായിരിക്കണം.

ജെ.ഡി.ടി പോളിടെക്​നിക്കിന്‍റെ മുറ്റത്ത്​ ശീതീകരിച്ച പെട്ടിയിൽ അന്ത്യവിശ്രമത്തിലായിരിക്കു​േമ്പാഴും മുഖത്ത്​ മായാതെ നിൽക്കുന്ന ഇളംചിരി ജീവിത സാഫല്യത്തിന്‍റെ മുദ്ര തന്നെയായിരിക്കണം. പൂർണമായും അടയാത്ത കണ്ണുകൾ വലയം ചെയ്​തു പോകുന്നവരിലേക്ക്​ സഹനത്തിന്‍റെയും സമർപ്പണത്തിന്‍റെയും ഊർജം പ്രസരിപ്പിക്കുന്നതായി തോന്നി. അത്​ സ്വന്തം കരുത്തായി കൊണ്ടു നടന്ന സഹപ്രവർത്തകരുടെയും സ്​നേഹിച്ചനുഗ്രഹിച്ച ശിഷ്യരുടെയും കൂടെ നടത്തിയ മാധ്യമം ജീവനക്കാരുടെയും ഉള്ളിലെ വിതുമ്പലായി.

പ്രസിദ്ധീകരണമാരംഭിച്ച്​ ഒന്നരമാസത്തിനു​ ശേഷം മാധ്യമത്തിൽ ജോലിയിൽ പ്രവേശിച്ചപ്പോൾ തന്നെ പിതൃതുല്യരായവർ ചൊരിഞ്ഞ സ്​നേഹവും സുരക്ഷയുമാണ്​ വെല്ലുവിളികൾ നിറഞ്ഞ ​ജോലിയുമായി മുന്നോട്ടു പോകാനുള്ള ധൈര്യം പകർന്നത്​. പത്രം നടത്തിപ്പ്​ സാഹസമായി ഏറ്റെടുത്ത സിദ്ദീഖ്​ സാഹിബ്​ അടക്കമുള്ളവർ പണം കണ്ടെത്താൻ നടത്തുന്ന നെ​ട്ടോട്ടങ്ങൾ ജീവനക്കാരുടെയെല്ലാം ചെവികളിൽ അപ്പപ്പോൾ എത്തിയിരുന്നു. അതുകൊണ്ടു തന്നെ എന്ത്​ ത്യാഗം സഹിച്ചും മാധ്യമത്തെ കരപറ്റിക്കാനുള്ള കഠിന യത്​നത്തിലായിരുന്നു പദവികളുടെ കനം നോക്കാതെ ഓരോരുത്തരും.

ബ്യൂറോയിലായിരിക്ക​ു​േമ്പാൾ വാർത്താ നഷ്​ടങ്ങളെ കുറിച്ചും പുതിയ വാർത്തകൾ കണ്ടെത്തേണ്ടതിനെ കുറിച്ചും ചെയർമാനിൽനിന്നും സെക്രട്ടറിയിൽനിന്നും എഡിറ്ററിൽനിന്നും അതിന്​ താഴെയുള്ളവരിൽനിന്നും വിളി വരാം. അതിലൊന്നും അസ്വസ്​ഥത തോന്നിയിരുന്നുമില്ല. ആദ്യം സെക്രട്ടറിയും പിന്നീട്​ ചെയർമാനുമായിരിക്കെ സിദ്ദീഖ്​ സാഹിബിൽനിന്നും അത്തരം വിളികൾ വന്നിരുന്നു. ഒരേ സമയം ഭയവും ബഹുമാനവുമുയർത്തിയ ആ വിളികൾ മാധ്യമത്തിന്‍റെ വളർച്ചയിലെ പടവുകളാവുകയായിരുന്നു.

പക്ഷേ, പ്രതിസന്ധികൾ കുമിഞ്ഞു കൂടുകയായിരുന്നു. പത്രം തുടങ്ങിയ പ്രസ്​ഥാനം തന്നെ മാധ്യമത്തിന്‍റെ​ അകാലചരമത്തിന്​ വിധിയെഴുതി. മൂന്ന്​ മാസത്തെ അവധി വാങ്ങി, മാധ്യമത്തിലെ ജീവനക്കാരെ വെള്ളിമാട്​ കുന്നിലെ ഐ.എസ്​.ടിയിൽ വിളിച്ചുവരുത്തിയത്​ സിദ്ദീഖ്​ സാഹിബായിരുന്നു. ആ കൂടിച്ചേരലിൽ, അദ്ദേഹത്തി​േന്‍റതടക്കമുള്ളവരുടെ വികാരനിർഭരമായ വാക്കുകൾ നെഞ്ചേറ്റി, മാനേജ്​മെന്‍റും ജീവനക്കാരും കൈമെയ്​ മറന്ന്​ തങ്ങളുടേതായ നിലം ഉഴുതു മറിച്ചാണ്​ മാധ്യമ ലോകത്ത്​ വിസ്​മയമായ വിളവെടുപ്പ്​ നടത്തിയത്​.

തുളുമ്പാത്ത സ്​നേഹം പകർന്നും ഒച്ചയില്ലാതെ ശാസിച്ചും ഗർവ്​ തെട്ടുതീണ്ടാതെയുമാണ്​ അദ്ദേഹം മാധ്യമത്തെയും അതിലെ ജീവനക്കാരെയും വഴിനടത്തിയത്​. പ്രസ്​ഥാനത്തിനകത്തും പുറത്തും​ എളിയ ജീവിതത്തിന്‍റെ മാതൃകയായി വർത്തിച്ച സിദ്ദീഖ്​ സാഹിബ്,​ ഇന്ത്യാ മഹാരാജ്യത്തിലെ കാരുണ്യസ്​പർശമേൽക്കാത്തവർക്കും അശരണർക്കുമുള്ള തണൽ മരമായി വളരുന്നതിനിടയിലാണ്​ രോഗാതുരനാവുന്നത്​. സ്​ഥലവും കാലവും നോക്കാതെ, രാവും പകലും നോക്കാതെ ജീവാർപ്പണം ചെയ്​തതിന്‍റെ ഭാഗമായിട്ടു കൂടിയായിരുന്നു രോഗം അദ്ദേഹത്തെ വരിഞ്ഞു മുറുക്കിയത്​. ശ്വാസം നിലക്കു​േമ്പാൾ മുക്കാൽ നൂറ്റാണ്ടിന്‍റെ ജീവിത സാഫല്യം, അദ്ദേഹം വരും തലമുറക്കായി അവശേഷിപ്പിച്ച തിളക്കമേറിയ നാഴികക്കല്ലുകളായിരിക്കും. അതായിരിക്കും അദ്ദേഹത്തിന്‍റെ ആത്​മശാന്തിക്ക്​ നിദാനവും.