മുത്തങ്ങ എക്സൈസ് ചെക്ക്പോസ്റ്റിൽ വൻ കഞ്ചാവ് വേട്ട, ഒരാൾ അറസ്റ്റിൽ

വയനാട്: മുത്തങ്ങ എക്സൈസ് ചെക്ക് പോസ്റ്റിൽ വച്ച് എക്സൈസ് സംഘം നടത്തിയ വാഹന പരിശോധനയിൽ എട്ട് കിലോയിലധികം കഞ്ചാവുമായി ഒരാൾ അറസ്റ്റിൽ. തൃശൂർ മുകുന്ദപുരം താലൂക്കിൽ താഴെക്കാട് വില്ലേജിൽ കുഴികാട്ടുശ്ശേരി സ്വദേശി പരിയാടൻ വീട്ടിൽ ലിബിൻ ജോൺസൻ (26) ആണ് അറസ്റ്റിലായത്.

ചെന്നൈ-കോഴിക്കോട് ഭാരതി ബസിലെ യാത്രികനായ ഇയാൾ, മൈസൂരിൽ നിന്നും കഞ്ചാവ് വാങ്ങി തൃശൂരിലേക്ക് ചില്ലറ വിൽപനക്കായി കൊണ്ടു പോവുകയായിരുന്നു. പ്രതിയെ സുൽത്താൻബത്തേരി എക്സൈസ് റേഞ്ച് ഓഫീസിന് കൈമാറി. 10 വർഷം വരെ കഠിനത്തടവ് ശിക്ഷ ലഭിച്ചേക്കാവുന്ന കുറ്റമാണ്.

എക്സൈസ് ഇൻസ്പെക്ടർ ജി.എം. മനോജ്കുമാർ, പ്രിവന്‍റീവ് ഓഫീസർമാരായ അബ്ദുൽ സലീം വി, രജിത്ത് പി.വി, സിവിൽ എക്സൈസ് ഓഫീസർമാരായ സജിത്ത് പി.സി, സുധീഷ് വി, വനിത സിവിൽ എക്സൈസ് ഓഫീസർമാരായ സിബിജ പി.പി, സിനി പി.എം എന്നിവർ പരിശോധനയിൽ പങ്കെടുത്തു.