ഓൺലൈൻ ക്ലാസിന്​ റേഞ്ച്​ തേടി രാത്രി പുറത്തിറങ്ങിയ വിദ്യാർഥിക്ക്​ പാമ്പു കടിയേറ്റു

പഴയന്നൂർ (തൃശൂർ): ഓൺലൈൻ ക്ലാസിനായി മൊബൈൽ ഫോണിന് റേഞ്ച് അന്വേഷിച്ച് രാത്രി പുറത്തിറങ്ങിയ വിദ്യാർഥിക്ക് പാമ്പ് കടിയേറ്റു. പ്ലസ് ടു വിദ്യാർഥിയും വെന്നൂർ കുളമ്പ് തെക്കേത്തൊടിയിൽ ഉണ്ണികൃഷ്ണ​െൻറ മകനുമായ വിവേകിനാണ് (16) കഴിഞ്ഞദിവസം രാത്രി വീടിനടുത്തുള്ള വയലിൽവെച്ച് പാമ്പ് കടിയേറ്റത്.

വീടിനടുത്ത് മൊബൈൽ റേഞ്ച് ഇല്ലാത്തതിനാൽ വിവേകും കൂട്ടുകാരും വയൽ വരമ്പിലിരുന്നാണ് ക്ലാസ്​ കേൾക്കുന്നതും നോട്ടുകൾ തയാറാക്കുന്നതും. മുളങ്കുന്നത്ത്കാവ് സർക്കാർ മെഡിക്കൽ കോളജിൽ ചികിത്സയിലുള്ള വിവേക് അപകടനില തരണം ചെയ്തിട്ടുണ്ട്​.