പൊന്മുടിയിൽ വിനോദ സഞ്ചാരികളുടെ കാർ കൊക്കയിലേക്ക് മറിഞ്ഞു

വിതുര: പൊന്മുടി 22ാം ഹെയർ പിൻ വളവിൽ വനം വകുപ്പ് ഓഫിസിന്​ സമീപം കാർ കൊക്കയിലേക്ക് മറിഞ്ഞു. കാറിലുണ്ടായിരുന്ന നാലുപേരും അദ്​ഭുതകരമായി രക്ഷപ്പെട്ടു. ഞായറാഴ്ച രാവിലെ 10ഓടെയായിരുന്നു സംഭവം.

രാവിലെ പൊന്മുടിയിലേക്ക് പോയ സംഘത്തിലെ ഒരാൾക്ക് മഞ്ഞും തണുപ്പും കാരണം ശ്വാസംമുട്ടനുഭവപ്പെട്ടതിനെ തുടർന്ന് അവിടെ തങ്ങാതെ പെട്ടന്ന് മടങ്ങുകയായിരുന്നു. മടക്ക യാത്രക്കിടയിൽ ഫോറസ്റ്റ്​ ഓഫിസിന്​ സമീപം ചെറിയ കലുങ്ക്​ തകർന്ന്​ കാർ കൊക്കയിലേക്ക് വീഴുകയായിരുന്നു.

മരങ്ങളിൽ തട്ടിത്തട്ടി കാർ 500 മീറ്റർ താഴേക്ക് പോയി നിന്നു. ഇതിനിടയിൽ കാറിലുണ്ടായിരുന്ന നവജ്യോതി എന്ന യാത്രക്കാരൻ കാറിൽ നിന്നും പുറത്തുചാടി രക്ഷപ്പെട്ടു. ഇയാൾ മുകളിലേക്ക് ഓടിക്കയറി. മറ്റു മൂന്ന്​ പേർ കാറിൽ കുടുങ്ങിക്കിടന്നു. അഞ്ചൽ, എരൂർ സ്വദേശികളായ നവജ്യോതി, ആദിൽ, അമൽ, ഗോകുൽ എന്നിവരാണ് കാറിലുണ്ടായിരുന്നത്.

അപകടവിവരമറിഞ്ഞ്​ വിതുരയിൽ നിന്ന്​ അഗ്​നിരക്ഷാസേനയും പൊലീസും നാട്ടുകാരും വനം വകുപ്പ് ജീവനക്കാരും സ്ഥലത്തെത്തി. വടം കെട്ടി അതിൽ തൂങ്ങിയാണ് താഴെക്കിടന്ന കാറിനടുത്തെത്തിയത്. വളരെ ശ്രമപ്പെട്ട്​ കാറിൽ കുടുങ്ങിക്കിടന്നവരെ പുറത്തെടുത്തു.

പിന്നീട് ഓരോരുത്തരെയായി മുള കമ്പിൽ പുതപ്പുകെട്ടി അതിൽ കിടത്തി തോളിലേറ്റിയാണ് റോഡിലെത്തിച്ചത്. ഗുരുതര പരിക്കേറ്റ മൂന്നു പേരെയും വിതുര താലൂക്കാശുപത്രിയിൽ പ്രാഥമിക ശുശ്രൂഷ നൽകിയ ശേഷം തിരുവനന്തപുരം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.