ഡെസ്കിലടിച്ച് താളമിട്ടതിന് ആദിവാസി വിദ്യാർഥിയെ മർദിച്ചെന്ന്

തൃശൂർ: ഡെസ്കിലടിച്ച് താളമിട്ടതിന് വെറ്റിലപ്പാറ സർക്കാർ പ്രീമെട്രിക് ഹോസ്റ്റലിൽ ആദിവാസി വിദ്യാർഥിയെ സെക്യൂരിറ്റി ജീവനക്കാരൻ മർദിച്ചതായി ആരോപണം. അടിച്ചിൽതൊട്ടി ഊരുനിവാസിയായ പത്താം ക്ലാസുകാരനാണ് മർദനമേറ്റത്. തിങ്കളാഴ്ച രാവിലെ ഏഴോടെയായിരുന്നു സംഭവം. അതിരപ്പള്ളി പൊലീസ് കുട്ടിയുടെ മൊഴിയെടുത്ത് അന്വേഷണം തുടങ്ങി.

സെക്യൂരിറ്റി ജീവനക്കാരനായ മധു മുളവടി കൊണ്ട് പുറത്ത് അടിക്കുകയായിരുന്നെന്ന് വിദ്യാർഥി പറഞ്ഞു. സംഭവത്തിൽ പൊലീസിനോടും ജില്ലാ ചൈൽഡ് പ്രൊട്ടക്ഷൻ ഓഫിസറോടും റിപ്പോർട്ട് തേടുമെന്ന് ബാലാവകാശ കമീഷൻ അറിയിച്ചു.