തൊഴിലുകൾ ഇല്ലാതാക്കിയത്​ കോൺഗ്രസ്​, കെ.പി.സി.സി നരേന്ദ്രമോദിയുടെ ബ്രാഞ്ച്​ ഓഫീസ്​ -വിജയരാഘവൻ

കണ്ണൂർ: പി.എസ്​.സി റാങ്ക്​ഹോൾഡേഴ്​സിനെ മുന്നിൽ നിർത്തി കോൺഗ്രസ്​ അക്രമ സമരം നടത്തുകയാണെന്ന്​ സി.പി.എം സംസ്ഥാന സെക്രട്ടറി എ.വിജയരാഘവൻ. സമരത്തെ നാട്​ അംഗീകരിക്കില്ല. ചെയ്യാൻ കഴിയുന്നത്​ സർക്കാർ ചെയ്​തു. ഏറ്റവുമധികം തൊഴിലവസരങ്ങൾ നൽകുകയും പൊതുമേഖലയെ പരിരക്ഷിക്കുകയും ചെയ്​ത സർക്കാറാണിതെന്നും വിജയരാഘവൻ കൂട്ടിച്ചേർത്തു.

ഇപ്പോഴുള്ള സമരം തദ്ദേശ തെരഞ്ഞെടുപ്പിന്​മുമ്പിൽ നടത്തിയ സമര ആഭാസങ്ങളുടെ തുടർച്ചയാണ്​. കേന്ദ്രത്തിനും ബി.ജെ.പിക്കുമെതിരെ ​കോൺഗ്രസിന് നിശബദ്​തയാണ്​. കേരളത്തിന്‍റെ വികസനം തടയുകയാണ്​ സമരത്തിന്​ പിന്നിൽ. ​യു.ഡി.എഫ്​ അക്രമ സമരങ്ങൾക്ക്​ ഗൂഢാലോചന നടത്തുന്നു. ഇല്ലാത്ത ഒഴിവിലേക്ക്​ എങ്ങനെയാണ്​ നിയമനം നടത്തുക. പുതിയ തസ്​തിക സൃഷ്​ടിച്ച്​ എല്ലാവർക്കും തൊഴിൽ കൊടുക്കാൻ സാധിക്കില്ല. തൊഴിലില്ലായ്​മ വർധിക്കാനും ഉള്ള തൊഴിലുകൾ ഇല്ലാതാക്കാനും കാരണം കോൺഗ്രസാണ്​.

നരേന്ദ്ര മോദിയുടെ ബ്രാഞ്ച്​ ഓഫീസാണ്​ കെ.പി.സിസി. കേന്ദ്രം തൊഴിലുകൾ ഇല്ലാതാക്കിയതിനെതിരെ കോൺഗ്രസിന്​ പ്രതികരണമില്ല. കെ.എസ്​.ആർ.ടി.സി താൽക്കാലിക ജീവനക്കാരെ പിരിച്ചുവിട്ടപ്പോൾ മാധ്യമപ്രവർത്തകരും ഉമ്മൻ ചാണ്ടിയും കാണിച്ച​ മാനുഷികതയാണ്​ ഇപ്പോൾ സർക്കാറും കാണിക്കുന്നത്​ -വിജയരാഘവൻ പറഞ്ഞു. എൽ.ഡി.എഫ്​ വികസന മുന്നേറ്റ ജാഥയോടനുബന്ധിച്ച് നടത്തുന്ന വാർത്താസമ്മേളനത്തിൽ സംസാരിക്കുകയായിരുന്നു വിജയരാഘവൻ.